September 27, 2022
September 27, 2022

નશાની હાલતમાં કાર ચલાવતા પોલીસકર્મીએ એક્ટિવા પર જતાં વૃદ્ધ દંપતીને ઉડાવ્યા

અકસ્માત સર્જનાર હેડ કોન્સ્ટેબલની અટકાયત

શહેરના નિઝામપુર વિસ્તારમાં એક કાર ચલાવતા પોલીસકર્મીએ એક્ટિવાને અડફેટે લેતા વૃદ્ધ દંપતીને ગંભીર ઈજાઓ થતાં હોસ્પિટલ ખસેડવામાં આવ્યા છે. પ્રાપ્ત માહિતી અનુસાર અકસ્માત સર્જનાર પોલીસકર્મી દારૂ પીધેલી હાલતમાં હોવાનું જાણવા મળ્યું છે. બનાવને પગલે સ્થાનિકો ભેગા મળી પોલીસકર્મીને ઝડપી પોલીસને હવાલે કરી દીધો હતો.

પોલીસકર્મીએ દારૂ પીધેલી હાલતમાં અકસ્માત સર્જ્યો
મળતી માહિતી પ્રમાણે શહેરના ફતેહગંજ પોલીસ સ્ટેશનની હદમાં એક પોલીસકર્મી દ્વારા જ અકસ્માત સર્જવામાં આવ્યો છે. બનાવની જાણ થતાં અન્ય પોલીસકર્મીએ દોડી આવ્યા હતા અને તપાસ હાથ ધરી હતી. આ સમગ્ર બનાવમાં હેડ કોન્સ્ટેબલ પ્રદીપ ગઢવીની અટકાયત કરી લેવામાં આવી છે અને તપાસ દરમિયાન હેડ કોન્સ્ટેબલ પ્રદીપ ગઢવીની કારમાંથી દારૂની બોટલો પણ મળી આવી છે, જેથી દારૂ પીધેલી હાલતમાં અકસ્માત સર્જ્યો હોય તેવી પૂરેપૂરી શંકા છે.

એક્ટિવા પર જતાં વૃદ્ધ દંપતીને ટક્કર મારી
અકસ્માત દરમિયાન હાજર સ્થાનિક અને અકસ્માતનો ભોગ બનેલા અક રિક્ષાચાલકે મીડિયાને જણાવ્યું હતું કે, કારચાલકે એક્ટિવા પર જતાં ઉમરલાયક કાકા-કાકીને ફૂલ સ્પીડમાં ઉડાવી દીધા. અકસ્માત બાદ વૃદ્ધ દંપતીના બચવાના કોઈ ચાન્સ લાગતા નથી કારણે કે તેમની ગંભીર ઈજાઓ થઈ છે. અકસ્માત સર્જ્યા બાદ કારચાલકે મહેસાણા ગરબા ગ્રાઉન્ડ તરફ ગાડી વાળી અને સીધી પાછી ડિવાઈડર કુદીને રિટર્ન મેઈન રોડ પર આવી ગઈ અને ત્યાં પણ એક એક્ટિવા ચાલકને અડફેટે લેતા તેમને પણ પગમાં ઈજાઓ થઈ છે. એટલું જ નહીં, કારચાલકે રિક્ષાને પણ અડફેટે લેતા પાછળના ભાગમાં નુકસાન થયું છે.

બનાવને પગલે મોટી સંખ્યામાં લોકો ઘટનાસ્થળે દોડી ગયા હતા અને ગંભીર રીતે ઈજાગ્રસ્ત થયેલા વૃદ્ધ દંપતીને સારવાર માટે હોસ્પિટલ ખસેડવામાં આવ્યા છે. બનાવની જાણ થતાં સ્થાનિક પોલીસનો કાફલો પણ દોડી આવ્યો હતો અને હેડ કોન્સ્ટેબલની અટકાયત કર્યા બાદ આગળની કાર્યવાહી હાથ ધરી હોવાનું જાણવા મળ્યું છે. ઘટનાને પગલે સ્થાનિકોમાં રોષ પણ જોવા મળી રહ્યો છે.

 42 ,  1 

Gujarat Vandan © 2021, All Rights Reserved