ગુજરાત વંદન

મોદી સરકારના શપથ પછી માર્કેટમાં ઉછાળો: સેન્સેક્સ 77000ને પાર, પાવર ગ્રીડ કોર્પ, અલ્ટ્રાટેક સિમેન્ટ, NTPC, એક્સિસ બેન્ક, નેસ્લેના શેર વધ્યા

10 Jun, 2024

દેશમાં એનડીએની સરકાર આવી ચુકી છે અને વડાપ્રધાન નરેન્દ્ર મોદીએ સતત ત્રીજી વખત વડાપ્રધાન પદના શપથ લીધા છે. મોદી 3.0ને સોમવારે શેરબજારે પણ સલામ ભરી છે અને ઈતિહાસ રચ્યો છે. સપ્તાહના પ્રથમ દિવસે સોમવારે બોમ્બે સ્ટોક એક્સચેન્જના 30 શેરોનો સેન્સેક્સ 323.64 અંકની જોરદાર તેજીની સાથે પ્રથમવાર 77,000ના સ્તરને પાર નીકળી ગયો છે. તે 77,017ના લેવલ પર ખુલ્યો હતો.

નેશનલ સ્ટોક એક્સચેન્જના નિફ્ટી ઈન્ડેક્સે પણ બજાર ખુલવાની સાથે 105 અંકની છલાંગ લગાવી હતી. છેલ્લા બે સપ્તાહના અંતિમ કારોબારી દિવસે એટલે કે શુક્રવારે સેન્સેક્સ અને નિફ્ટીમાં જોરદાર વધારો જોવા મળ્યો હતો અને તે વધારા સાથે બંધ થયો હતો. સેન્સેક્સ 1618.85 કે 2.16 ટકાની તેજીની સાથે 76,693.41ના સ્તરે ક્લોઝ થયો હતો.

તેજીની સાથે ખુલ્યો 2196 શેર

શેરબજારમાં ગત શુક્રવારથી તેજી જોવા મળી રહી છે. સેન્સેક્સ 77017ના સ્તરે ખુલ્યા પછીથી 77,079.04ના સ્તરે પહોંચી ગયો હતો. બીએસઈ ઈન્ડેક્સનું નવું ઓલ ટાઈમ હાઈ લેવલ છે. માર્કેટમાં કારોબારી શરૂઆતની સાથે લગભગ 2196 શેર તેજીની સાથે ગ્રીન નિશાન પર ઓપન થયા હતા. જ્યારે 452 કંપનીઓના શેરોએ ઘટાડા સાથે લાલ નિશાનમાં કારોબાર શરૂ કર્યો. જ્યારે 148 શેરની સ્થિતિમાં કોઈ જ ફેરફાર જોવા મળ્યો નથી.

શરૂઆતના કારોબારમાં નિફ્ટી ઈન્ડેક્સ પર અદાણી પોર્ટ્સ, પાવર ગ્રીડ, બજાજ ઓટો, કોલ ઈન્ડિયા અને શ્રીરામ ફાઈનાન્સના શેરમાં સૌથી વધુ તેજી જોવા મળી. જોકે તેનાથી વિપરીત ટેક મહિન્દ્રા, ઈન્ફોસિસ, ડો.રેડ્ડીઝ લેબ, એલટીઆઈ માઈન્ડટ્રી અને હિંડલ્કોના શેરમાં ઘટાડો નોંધાયો છે.

શેરબજારમાં લિસ્ટેડ ભારતીય અબજપતિ ગૌતમ અદાણીની કંપનીઓના શેરમાં તેજી જોવા મળી. અદાણી એન્ટ, અદાણી પોર્ટથી લઈને અદાણી પાવરના શેરમાં તેજી જોવા મળી રહી છે. એશિયાના સૌથી વધુ અમીર માણસ મુકેશ અંબાણીની કંપની રિલાયન્સ ઈન્ડસ્ટ્રીનો શેર પણ લગભગ 1 ટકા તેજીની સાથે કારોબાર કરી રહ્યો હતો.