September 27, 2022
September 27, 2022

રાજેન્દ્ર ત્રિવેદી સામે હાથ જોડનારા સર્કલ ઓફિસર સસ્પેન્ડ

11 નાયબ મામલતદારોની બદલી

મહેસૂલ મંત્રી રાજેન્દ્ર ત્રિવેદીએ જિલ્લા કલેક્ટર ઓફિસની ઓચિંતી મુલાકાત લઈને ત્યાં ચાલતી લાલીયાવાડી ઉજાગર કર્યા બાદ હવે 11 નાયબ મામલતદારોની બદલી કરી દેવાઈ છે. નિવૃત્ત તલાટીને ઓફિસમાં બેસાડીને જે સર્કલ ઓફિસર તેમની પાસે કામ કરાવતા રંગેહાથ ઝડપાયા હતા તેમને પણ સસ્પેન્ડ કરી દેવાયા છે. ઉલ્લેખનીય છે કે, આ સર્કલ ઓફિસર પોતાની પોલ પકડાઈ ગયા બાદ રાજેન્દ્ર ત્રિવેદી સામે હાથ જોડીને માફી માગતા જોવા મળ્યા હતા. ત્યારબાદ તેમને કારણદર્શક નોટિસ પણ પાઠવવામાં આવી હતી. તેમની નિવૃત્તિને આડે બે મહિના જ બાકી છે તે વખતે જ તેમને સસ્પેન્ડ કરાતા થોડા દિવસોમાં તેમને મળનારું મામલતદારનું પ્રમોશન પણ લટકી ગયું છે.

મહેસૂલ મંત્રીના ‘દરોડા’ બાદ સોમવારે ગાંધીનગર જિલ્લા કલેક્ટરે 11 નાયબ મામલતદારોની બદલી કરવાનો ઓર્ડર કર્યો હતો. એક તરફ મંત્રીના દરોડાથી દોડતા થઈ ગયેલા તંત્રએ તાબડતોબ બદલીઓ કરી હોવાની ચર્ચા છે ત્યારે બીજી તરફ, અધિકારીઓ દ્વારા ખાલી જગ્યા ભરવા માટે, વહીવટી સરળતા માટે અને ઘણા વખતથી પેન્ડિંગ બદલીઓની કાર્યવાહી પૂરી થઈ હોવાનું કહીને બચાવ કરવામાં આવી રહ્યો છે. ઈશ્વર દેસાઈ સસ્પેન્ડ થતાં તેમની જગ્યાએ અડાલજના સર્કલ ઓફિસર તરીકે જે.ઓ. દેસાઈને મૂકવામાં આવ્યા છે.

28 એપ્રિલના રોજ સાંજે રાજેન્દ્ર ત્રિવેદી ગાંધીનગર કલેક્ટર ઓફિસમાં પહોંચ્યા હતા. ઓફિસમાં પ્રવેશતા જ તેઓ સર્કલ ઓફિસરની રુમમાં ગયા હતા, જ્યાં નાયબ મામલતદાર તરીકે ફરજ બજાવતા ઈશ્વર દેસાઈ ગેરકાયદે રીતે એક નિવૃત્ત તલાટીને ઓફિસમાં બેસાડીને કામ કરાવી રહ્યા હોવાનું મંત્રીના ધ્યાને આવ્યું હતું. આ બાબતે રાજેન્દ્ર ત્રિવેદીએ તેમના ફેસબુક લાઈવમાં જ ઈશ્વર દેસાઈનો ઉધડો લઈ નાખ્યો હતો, તેમજ ઓફિસમાં કામ વિના બેસી રહેલા લોકોને પણ બહાર કાઢી મૂક્યા હતા. રાજેન્દ્ર ત્રિવેદીનું રૌદ્ર સ્વરુપ જોઈને ઈશ્વર દેસાઈ હાથ જોડીને તેમની માફી માગવા લાગ્યા હતા. જોકે, મંત્રીએ તેમને માફી આપવાનો ઈનકાર કરી દીધો હતો.

 56 ,  1 

Gujarat Vandan © 2021, All Rights Reserved