ગુજરાત વંદન

જન્મદિવસની ઉજવણી દંપતીને ભારે પડી: નશો કરીને પૂર ઝડપે કાર ચલાવતા ચાલકે મારી જોરદાર ટક્કર, દંપતીની કાર 15 ફૂટ ઘસડાઇ,થયું મોટું નુકસાન ...

14 May, 2024

આજના આધુનિકયુગમાં જન્મદિવસની ઉજવણી હોય કે પછી બીજો કોઇ પ્રસંગ ,દરેક ઉજવણીને ખાસ બનાવવા માટે બહાર હરવા-ફરવા સાથે જમવા જવાનો ટ્રેન્ડ યુવા પેઢીમાં વધ્યો છે,તાજેતરમાં આવી જ એક ઉજવણી કરીને પરત ફરતા દંપતીની કારને ટક્કર વાગતા સદનસીબે કોઇ જાનહાનિ થઈ ન હતી પરંતુ કારને પુષ્કળ નુકસાન થયું હતું.

બનાવની વિગત મુજબ અમદાવાદ શહેરમાં રહેતું દંપતી જન્મદિવસની ઉજવણીમાં ઘરે કેક કાપીને બહાર ફરવા ગયું અને ઘરે પરત ફરતી વેળાએ સિંધુભવન રોડ પર શિલ્પ સર્કલ પર સિગ્નલ બંધ હોવાથી દંપતીએ કાર ઊભી રાખી હતી. તે સમયે પાછળથી પૂરઝડપે આવેલા દારૂ પીધેલા કારચાલકે દંપતીની કારને જોરદાર ટક્કર મારી નુકસાન કર્યું હતું. સદનસીબે કોઈ જાનહાનિ થઈ નહતી ,ઘટના બાદ ડિવિઝન ટ્રાફિક પોલીસે દારૂ પીધેલા કારચાલકની ધરપકડ કરી છે.

સેટેલાઈટના નીલકંઠ બંગ્લોઝમાં રહેતા હર્ષ ઠક્કરની પત્નીનો જન્મ દિવસ હોવાથી કેક કાપીને શનિવારે રાત્રે સિંધુભવન રોડ પર કાર લઈને ફરવા નિકળ્યા હતા. તે સમયે શિલ્પ સર્કલ સિગ્નલ બંધ હોવાથી સિગ્નલ પર ઊભા હતા. આ દરમિયાન એક કારચાલક પૂરપાટ ઝડપે કાર ચલાવીને હર્ષભાઈની કારને ટક્કર મારી હતી. જેથી તેમની કાર 15 ફૂટ જેટલી ઘસડાઈ હતી. અકસ્માત બાદ આસપાસના લોકો ભેગા થઈ ગયા હતા અને કારચાલકને પકડી લીધો હતો.

કારચાલક ચિક્કાર દારૂ પીધેલી હાલતમાં મળી આવતા એ વિસ્તારના ડિવિઝન ટ્રાફિક પોલીસને જાણ કરાઇ હતી. પોલીસે ઘટનાસ્થળે પહોંચીને અકસ્માત કરનાર કારચાલકની ધરપકડ કરી હતી. આરોપીની પૂછપરછ દરમિયાન તેનું નામ નરેન્દ્રસિંહ રાજપુરોહિત (ઉ.વ.27) અને જીવરાજપાર્કના પવનસુતક સોસાયટીમાં રહેતો હોવાનું સામે આવ્યું હતું. હાલમાં પોલીસ ગુનો નોંધીને પૂછપરછની કાર્યવાહી હાથ ધરી છે.

ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ‎

https://shorturl.at/hjzN0