એક તો ચોરી ઉપરથી સીના જોરી : મહિલા કર્મચારીનું જબ્બર કારસ્તાન , પોતાના શેઠના ઘરે ચોરી કરી ઉપરથી ખંડણીની માંગણી પણ કરી..
![top-news](https://gujaratvandan.com/public/uploads/images/newsimages/GujaratVandan14062024_084932_Untitled-1-208.webp)
- 14 Jun, 2024
વધતી જતી મોંધવારીને ડામવા તંત્ર નિષ્ફળ જતા , સામાન્ય જન આવક વધારવાના સહેલા રસ્તા શોધવા તરફ જઈ રહ્યો છે . જો તેને સહેલાઈથી આવક વૃદ્ધિ કરવાનો રસ્તો ન મળે તો તે અવળા માર્ગે અટલે કે ચોરી કરવાના માર્ગે પણ ચઢી જાય છે. ઉપરાંત તે ચોરી કરવા માટે અલગ અલગ કિમિયા પણ શોધી કાઢે છે.
આવી જ એક ઘટના શહેરમાં ધોળા દિવસે બની હતી , બનાવની વિગત મુજબ કામ માગવા આવનાર મહિલા થોડા દિવસ કામ કર્યા બાદ તેજ ઘરમાંથી ચોરી કરી ભાગી ગઈ અને વળી પાછી આવીને માલિક પર જ ખોટા આરોપો કરીને તેની પાસેથી પૈસાની માંગણી કરી હતી. શહેરના સાબરમતી વિસ્તારમાં માં શેરબજારનું કામ કરતા જૈન પરિવારને કર્મચારી યુવતીને પોતાના ઘરે રાખવાનું મોંઘું પડ્યું છે. પોતાના ઘરેથી ચોરી કરીને ભાગી ગયેલી યુવતી તેના ભાઇ સાથે પરત આવી અને શેઠને ધમકી આપે છે કે જો તમે ત્રણ કરોડ નહીં આપો તો તમને છેડતી અને બળાત્કારના કેસમાં ફસાવી દઇશ.
આ બાબતે સાબરમતી પોલીસે ફરિયાદ નોંધીને તપાસ શરૂ કરી છે. વિચિત્ર બનાવની જાણવા જેવી વિગતો એવી છે કે સાબરમતી વિસ્તારમાં આવેલા શાશ્વત સ્કાપ બિલ્ડિંગમાં રહેતા સીતાકુમારી જૈને સાબરમતી પોલીસ સ્ટેશનમાં ભારતી ઉર્ફે વંદના શર્મા અને પવન શર્મા વિરુદ્ધ સાબરમતી પોલીસ સ્ટેશનમાં ખંડણી, ચોરી તેમજ ખોટા કેસમાં ફસાવી દેવાની ફરિયાદ કરી છે.
સીતાકુમારી પતિ મદનલાલ અને દીકરો અનુરાગ અને દીકરી ક્રિતીકા સાથે રહે છે અને ઘરેથી સ્ટોક માર્કેટનો ધંધો કરે છે. 7મી ફેબ્રુઆરીના રોજ સીતાકુમારીએ તેમની કંપનીમાં ભારતી ઉર્ફે વંદના શર્મા ઇન્ટરવ્યૂ આપવા માટે આવી હતી.ઇન્ટરવ્યૂમાં તે સિલેક્ટ થઇ જતા ભારતીએ નોકરી શરૂ કરી હતી. ભારતી સવારથી સીતાકુમારીના ઘરે નોકરી કરવા માટે આવી જતી હતી અને તેને મૂકવા માટે તેના ભાઇ પવન શર્મા કે પિતા કૈલાસભાઇ આવતા હતા.
નોકરી કર્યાના થોડા દિવસ બાદ ભારતીના માતા-પિતા સીતાકુમારીને મળવા આવ્યા હતા અને થોડા દિવસ સુધી તેને ઘરમાં રાખવા માટે વિનંતી કરી હતી. સીતાકુમારીએ ભારતીને ઘરે રાખી હતી જ્યાં તે નોકરી પણ કરતી હતી. દરમિયાનમાં સીતાકુમારીને ખબર પડી હતી કે ભારતીનો રોની સોલંકી કરીને પ્રેમી છે, જેની સાથે તે ભાગીને લગ્ન કરવાની છે જેના કારણે તેના માતા પિતાએ ભારતીને સીતાકુમારીના ઘરે રાખી છે. 25 માર્ચના રોજ હોળીનો તહેવાર હોવાથી ભારતી તેના ઘરે ગઇ હતી.
જ્યાં રાતે દસ વાગે કપડા લેવા સીતાકુમારીના ઘરે પરત આવી હતી. ભારતી સીતાકુમારીના ઘરેથી જતી રહેતા તેમણે સીસીટીવી ફુટેજ ચેક કર્યા હતા. સીસીટીવી ફુટેજ જોતા ખબર પડી હતી કે ભારતીએ 50 હજાર રોકડ, શેરબજારના ડોક્યુમેન્ટ, દાગીના સહિત કુલ 3.20 લાખ ચોરી લીધા છે. સીતાકુમારીએ તરત જ કૈલાસ શર્માને ફોન કર્યો હતો અને ચોરી કરી હોવાની જાણ કરી હતી. કૈલાસ શર્માએ તેમને દાગીના તેમજ રૂપિયા પરત આપી દેશે તેની બાહેધરી આપી હતી.
ભારતીની આર્થિક પરિસ્થિતિ ખરાબ હોવાના કારણે તેણે ચોરી કરી હોવાની કબૂલાત કરી હતી. આ દરમિયાનમાં ભારતી અને તેના ભાઇ પવન શર્માએ સીતાકુમારી તેમજ તેના પતિને ધમકી આપી હતી કે જો તમે મને ત્રણ કરોડ રૂપિયા નહીં આપો તો તમને બળાત્કાર અને છેડતીના કેસમાં ફસાવી દઇશું. સીતાકુમારી અને મદનલાલ ગભરાઇ જતા તેમણે ફરિયાદ કરવાનું ટાળ્યું હતું. અંતે દંપતીએ હિંમત દાખવી સાબરમતી પોલીસ સ્ટેશનમાં ભારતી અને પવન વિરુદ્ધ ચોરી, ખડણી તેમજ ખોટા કેસમાં ફસાવી દેવાની ધમકી આપી હોવાની ફરિયાદ કરી છે.