ગાંધીના ગુજરાતમાં દારૂબંધી શું નામ પુરતી છે ? : આ જેલમાં કેદીઓ કરતા હતા દારૂની પાર્ટી ,જાણો કઈ રીતે બહાર આવી સમગ્ર ઘટના
![top-news](https://gujaratvandan.com/public/uploads/images/newsimages/GujaratVandan22072024_070044_compressed_image (33).webp)
- 22 Jul, 2024
રાજયમાં દારૂ બંધી હોવા છત્તા દારૂનો વેપાર પુષ્કળ પ્રમાણમાં ફૂલ્યો ફાળયો છે. મોટા શહેર ઉપરાંત નાના શહેરોમાં પણ દારૂનું ગેરકાયદે વેચાણ થાય છે,તંત્ર દ્વારા કેટલી વખત દારૂનો જથ્થો પકડવાની ઘટના સામે આવતી હોય છે. પરંતુ તેનાથી દારૂના વેપાર અને વેચાણને ક્ઈ અસર થતી હોય તેવું લાગતું નથી. એવામાં એક ચોકાવનારી ઘટના સામે આવી હતી. પ્રાપ્ત માહિતી મુજબ ગાંધીધામની એક જેલમાં દારૂની મહેફિલ માણવામાં આવી રહી હોવાની માહિતી મળતા પોલીસ દ્વારા અચાનક રેડ પાડવામાં આવતા વધુ વિગતો સામે આવી હતી.
ગાંધીધામની ગળપાદર જેલમાં કુખ્યાત આરોપી સજા ભોગવવાને બદલે ત્યાં જલસા કરી રહ્યો હોવાની માહિતી મળી હતી. તેને આધારે પોલીસ અધિકારીએ ત્યાં દરોડા પાડવાની યોજના ધડી કાઢી સમગ્ર સ્ટાફ સાથે ખાનગી બસ લઈને દરોડા પાડવા મધરાતે પહોંચી ગયા અને દારૂની બોટલ અને મોબાઈલ સહિતનો મુદ્દામાલ કબજે કરવામાં આવ્યો હતો.પોલીસની આ સરપ્રાઇઝ ચેકિંગમાં કુખ્યાત ગુનેગાર અને બૂટલેગર યુવરાજસિંહ જાડેજા સહિત 6 આરોપીઓને પોલિસે ઝડપી પડ્યા હતા. વધુ તપાસ કરતાં તેમની પાસેથી મોબાઈલ ફોન પણ મળી આવ્યો હતો.
મળતી વિગતોને આધારે પોલીસે જેલની પુરૂષ યાર્ડ બેરેક નં-1 મા સરપ્રાઇઝ વીઝીટ કરી હતી. બેરેક નં.1 ની સરપ્રાઇઝ વીઝીટ કરતા બેરેકેમાં હાજર કેદીઓને યોગ્ય સ્થાને બેસાડી દઈને તેઓની વારફરતી ચકાસણી કરવામાં આવતા તેમના સામાનની ચેકિંગ કરતા 6 જેટલા લોકો કેફી પીણુ પીધેલ હાલતમાં મળી આવ્યા હતા. આ ઉપરાંત વધુ તપાસમાં એક બોટલમાં ઇંગ્લીશ દારૂ મળી આવ્યો હતો, તેમજ એક મોબાઇલ મળી આવ્યો હતો. ત્યારબાદ વધુમાં કેફીપીણુ પીધેલ આરોપીઓની શરીર સ્થિતિનું તથા મળી આવેલ ઇંગ્લીશ દારૂની બોટલ અને એક મોબાઇલ સંબંધે પંચનામું કરવામાં આવ્યું હતું.
કેદીઓની વધુ પૂછપરછ દરમિયાન એક કેદીનું નામ પુછતા તેણે પોતાનું નામ પણ તોતડાતી જીભે જણાવ્યું હતું. તથા કેદીની લાલધુમ આંખો જોતા તે નશામાં હોવાનું જણાઈ આવ્યું હતું. ઉપરાંત અન્ય કેદીનું મોઢુ સુંધતા તેના મોઢામાંથી કેફીપીણુ પીધેલાની તીવ્રવાસ આવતી હતી. જે અંગેનું પંચનામું કરી આરોપી વિરૂધ્ધ કાયદેસરની કાર્યવાહી કરવા ફરીયાદ નોંધવામાં આવી છે. બીજા 5 કેદીઓએ પણ કેફીપીણુ પીધેલ હોતા તેમની વિરૂધ્ધ પણ ફરીયાદ કરવામાં આવી છે. આરોપી વિરૂધ્ધ પ્રોહીબિશન કલમ-66(1)(બી) મુજબ ગુનો નોંધી કાયદેસરની કાર્યવાહી ગાંધીધામ એ ડિવિઝન પોલીસ સ્ટેશન દ્વારા હાથ ધરવામાં આવી છે.
એવામાં હવે જેલમાં દારૂની બોટલ ક્યાંથી આવી?, તે અંગે સવાલો ઊભા થઈ રહયા છે. અને જેલમાં 6 જેટલા કેદીઓ સાથે મળીને દારૂની મહેફિલ બિંદાસ થઈ કેવી રીતે માણી રહ્યા હતા? ઉપરાંત તેમની પાસે મોબાઈલ કેવી રીતે પહોંચ્યો એવા અનેક સવાલો સામે આવી રહ્યા છે.શું આ બધી વસ્તુઓ તેમણે કોઈએ પહોંચાડી? પોલીસ પ્રશાસન ના બંદોબસ્તમાં ક્યાં કચાશ રહી ગઈ જેવા અનેક સવાલો ઉભા થયા છે જેનો જવાબ આગામી સમયમાં તપાસ બાદ સામે આવશે તેવી આશા રાખવામાં આવી રહી છે.