September 25, 2022
September 25, 2022

કિશોર બિયાની મહિનામાં ત્રીજી વાર ડિફોલ્ટર જાહેર

આ વખતે બેન્કોને 2888 કરોડ ચુકવામાં નિષ્ફળ

રિટેલ ઉદ્યોગના અગ્રણી કિશોર બિયાની (Kishore Biyani) એક પછી એક લોનની ચુકવણીમાં ડિફોલ્ટર બની રહ્યા છે. માર્ચ મહિનામાં તેઓ કુલ ત્રણ વખત ડિફોલ્ટ થયા હતા, જેમાં 31 માર્ચે તેમની કંપની ફ્યુચર એન્ટરપ્રાઈઝ (Future Enterprises) બેન્કોને રૂ. 2888 કરોડની લોનની ચુકવણી કરવામાં નિષ્ફળ રહી હતી. કુલ ત્રણ ડિફોલ્ટમાં તેમણે બેન્કોને રૂ. 3001 કરોડની ચુકવણી કરી નથી.

ફ્યુચર એન્ટરપ્રાઈઝ લિમિટેડે (FEL) શેરબજારને જણાવ્યું કે તેણે 23 માર્ચે 94 કરોડ રૂપિયા, 28 માર્ચે 19 કરોડ રૂપિયા અને 31 માર્ચે 2888 કરોડ રૂપિયાની ચુકવણી કરી નથી. વન ટાઈમ રિસ્ટ્રક્ચરિંગ (OTR) હેઠળ આ રકમ ચુકવવાની છેલ્લી તારીખ હતી. ગયા વર્ષે એપ્રિલમાં તેમણે ધિરાણકારો સાથે ડીલ કરી હતી, પરંતુ નાણા ચુકવી શક્યા નથી.

પોતાની લોનને નોન-પરફોર્મિંગ લોન બનતી અટકાવવા માટે ફ્યુચર એન્ટરપ્રાઈઝ લિમિટેડે એક મહિનાના ક્યુરેટિવ પિરિયડમાં આ રકમ ચુકવવાની રહેશે. ફ્યુચર જનરાલી ઇન્ડિયા ઇન્શ્યોરન્સ કંપનીમાંથી પોતાનો હિસ્સો વેચીને ફ્યુચર એન્ટરપ્રાઈઝ ધિરાણકારોને ચુકવણી કરવાની હતી. જાન્યુઆરીમાં જનરાલી પાર્ટિસિપેશન નેધરલેન્ડ્સને વીમા સાહસમાં પોતાનો 25 ટકા હિસ્સો રૂ. 1252 કરોડમાં ચુકવવા ફ્યુચર ગ્રૂપ તૈયાર થયું હતું.

પરંતુ આ ડીલને રેગ્યુલેટરી મંજુરી મળી ન હતી. તેના કારણે ફ્યુચર એન્ટરપ્રાઈઝ પોતાના ધિરાણકારોને પેમેન્ટ કરી શકી નથી. જોકે, ધિરાણકારોને તેણે કુલ 3001 કરોડ રૂપિયાની ચુકવણી કરવાની છે તેથી વીમા કંપની સાથેની ડીલ થઈ હોત તો પણ આટલી મોટી રકમ ચુકવી શકાઈ ન હોત.

FELએ ફ્યુચર ગ્રૂપની હોલ્ડિંગ કંપની છે અને તેના પર કુલ રૂ. 5000 કરોડનું દેવું છે. ગયા વર્ષે ડિસેમ્બરમાં તેની ફ્લેગશિપ કંપની ફ્યુચર રિટેલ (Future Retail) પણ રૂ. 3495 કરોડની ચુકવણી કરવામાં નિષ્ફળ ગઈ હતી. ત્યાર બાદ બેન્કોઓ ઇનસોલ્વન્સી એન્ડ બેન્કરપ્સી કોડ (IBC) હેઠળ રિકવરી કરવાનો નિર્ણય લીધો હતો.

કિશોર બિયાનીની બીજી કંપનીઓ પર પણ બેન્કો આકરી બની રહી છે. ફ્યુચર રિટેલ અંગે તાજેતરમાં બેન્ક ઓફ ઇન્ડિયાએ અખબારોમાં એક પબ્લિક નોટિસ આપી હતી અને બીજા ધિરાણકારોને ચેતવણી આપી હતી કે ફ્યુચર રિટેલની એસેટ અંગે કોઈ પણ ડિલ કરવી નહીં. એપ્રિલમાં ફ્યુચર ગ્રૂપની તમામ કંપનીઓ પોતાના શેરહોલ્ડરો અને પોતાને ધિરાણ કરનારી તમામ બેન્કો સાથે બેઠક યોજશે અને રૂ. 24,713 કરોડની ડીલ વિશે તેમનો મત જાણશે.

 90 ,  1 

રસપ્રદ

રાજકારણ

વ્યાપાર

Gujarat Vandan © 2021, All Rights Reserved