September 27, 2022
September 27, 2022

ગુડ ન્યૂઝ : આ રીતે બચાવ્યા 800 લોકોના જીવ…

એક મહિલાએ માતાની યાદગીરીમાં શરૂ કરી ઓક્સિજન રિક્ષા

કહેવત છે કે, મન હોય તો માળવે જવાય.. એ કહેવતને અનુસાર એક મહિલાએ પોતાની માતાની યાદમાં માનવતાનું એવું સદ્કાર્ય હાથ ધર્યું કે તેમની સેવાથી લગભગ 800 લોકોના જીવ બચાવી શક્યા છે. આ મહિલા સલામને પાત્ર છે.

કોરોના મહામારીની બીજી લહેર સામે લોકોની હિંમત તૂટી ગઈ હતી. ઓક્સિજનની કમીના કારણે મૃત્યુ પામનારા લોકોના આંકડા ડરાવે તેવા હતા. બીજી લહેર દરમિયાન ઓક્સિજન સિલિન્ડર મેળવવા માટે લોકો અહીંયાથી ત્યાં ભટકતા હોય તેવા દ્રશ્યો પણ આપણે નજરે જોયા હતા. કેટલાક તો પોતાના સ્વજનને બચાવવા માટે સવારથી જ ઓક્સિજન માટેની લાઈનમાં લાગી જતા હતા. પરંતુ ઓક્સિજન ન મળવાના કારણે ઘણાએ પોતાની નજીકની વ્યક્તિને ગુમાવી હતી. ચેન્નાઈની સીતા દેવી પણ તેમાંથી એક છે, જેમણે ઓક્સિજનની ઉણપના કારણે પોતાના માતા ગુમાવ્યા હતા. પરંતુ બાદમાં તેમણે કરેલી હિંમતે 800 જેટલા લોકોના જીવ બચાવી લીધા.

ચેન્નઈમાં રહેતી 36 વર્ષની સીતા દેવીના 65 વર્ષના માતા વિજયા, ડાયાલિસિસના દર્દી હતા, જેઓ કોરોનાની બીજી લહેર દરમિયાન સંક્રમિત થયા હતા. તેવામાં સીતા તરત જ તેમને રાજીવ ગાંધી સરકારી હોસ્પિટલ લઈ ગઈ હતી. જ્યાં ઓક્સિજન બેડ ન હોવાના કારણે કેટલાક કલાક હોસ્પિટલ બહાર રાહ જોવાનું કહેવામાં આવ્યું હતું.

તેણે એક ઈન્ટરવ્યૂમાં જણાવ્યું કે, ‘મારે મારી માતા માટે ઓક્સિજન બેડ મેળવવા 12 કલાક રાહ જોવી પડી. એમ્બ્યુલન્સની ઘટ પડતાં ઓક્સિજન લેવલના કારણે અમને વારંવાર એક એમ્બ્યુલન્સમાંથી બીજી એમ્બ્યુલન્સમાં શિફ્ટ કરી રહ્યા હતા. અંતમાં વાયરસે તેમનો જીવ લઈ લીધો. જો મારી માતાને તરત ઓક્સિજન મળી ગયો હતો તો તેમનો જીવ ન ગયો હતો. મારી માતા જે સ્થિતિમાંથી પસાર થઈ તેમાંથી કોઈ અન્ય પસાર થાય તેમ હું નહોતી ઈચ્છતી. તેથી મેં રિક્ષા દ્વારા હોસ્પિટલ બહાર ઓક્સિજન પહોંચાડવાનું નક્કી કર્યું’

સીતા દેવીએ લોકોની મદદ કરવાનું વિચાર્યું અને મે મહિનાથી પોતાની ‘ઓક્સિજન ઓટો’ દ્વારા 800 લોકોના જીવ બચાવ્યા અને આ સુવિધા તેણે જરૂરિયાતમંદોને ફ્રીમાં આપી હતી. સીતા દેવી એક એનજીઓ પણ ચલાવે છે. તેની મદદથી તેણે રિક્ષા લીધી અને તેમા ઓક્સિજન સિલિન્ડર તેમજ ફ્લો મીટર જોડીને ઘણા લોકોના જીવ બચાવ્યા.

આ કામમાં બે વોલેન્ટિયરે સીતાને સાથ આપ્યો. જેની મદદથી તે ‘રાજીવ ગાંધી સરકારી જનરલ હોસ્પિટલ’ સામે સવારના 8થી રાતના 8 વાગ્યા સુધી જરૂરિયાતમંદોને ઓક્સિજન ઉપલબ્ધ કરાવતી હતી. તે સમયે તે રોજ આશરે 25થી 30 લોકોને મદદ કરતી હતી.

 78 ,  2 

Gujarat Vandan © 2021, All Rights Reserved