તકમરિયાનું ડ્રિંક "સુપર ડ્રિંક " : ગરમીમાં રાખશે પેટને સુપર કુલ ...
- 14 Jun, 2024
તકમરિયાનું પીણું "સુપર ડ્રિંક " સવારે ખાલી પેટે પીવાનાં ફાયદા અનેક...
તકમરિયા એક એવું "સુપરડ્રિંક " છે, જે પરંપરાગત ઔષધિઓમાં પણ ઉપયોગમાં લેવાતું આવ્યું છે. તકમરિયાને પ્રોટિનનું પાવરહાઉસ કહેવાય છે, આ ઝીણાં દાણાં શરીર માટે જરૂરી ફેટી એસિડથી ભરપુર હોય છે, તેમાં પાચન વધારનારા રેસા હોય છે. તે ઉપરાંત તેમાં કેલ્શિયમ, મેગ્નેશિયમ, આયર્ન અને અન્ય માઇક્રોન્યુટ્રીએન્ટ્સ રહેલાં હોય છે. તેનાથી પેટમાં ગેસ નથી થતો અને સરળતાથી પેટ સાફ થઈ જાય છે. ખાલી પેટે તકમરિયા પીવાથી તમારા શરીરમાં એનર્જી પણ વધે છે. સાથે જ તે ત્વચા અને વાળ માટે પણ ફાયદાકારક છે. તકમરિયા પાણીમાં પલાડતાં પહેલાં કડક હોય છે, પરંતુ પાણીમાં રહ્યાં પછી એ જેલી જેવા પારદર્શક અને પોચાં થઈ જાય છે.
પોષકતત્વોથી ભરપુર
તકમરિયામાં ભરપુર માત્રામાં પ્રોટિન, ફેટી એસિડ, રેસા, અનેક પ્રકારના વિટામિન, કેલ્શિયમ, મેગ્નેશિયમ અને આયર્ન રહેલાં છે. ખાલી પેટે તકમરિયાનું પાણી પીવાથી શરીર આ પોષકતત્વોને અસરકારક રીતે ગ્રહણ કરી શકે છે.
પાચનતંત્ર માટે આશિર્વાદરૂપ
તકમરિયાનો સૌથી મહત્વનો ફાયદો એ છે કે તે પાચનતંત્ર માટે આશીર્વાદરૂપ છે. તેમાં રેસાનું પ્રમાણ વધારે હોવાથી સરળતાથી પેટ સાફ થાય છે અને પેટમાં ગેસ જમા થતો નથી. તે સરળતાથી ગેસને બહાર કાઢવામાં મદદ કરે છે. સવારે તકમરિયાનું પાણી પીવાથી સમગ્ર પાચનતંત્ર સ્વચ્છ રહે છે અને તે પેટને નિરોગી રાખે છે.
વજનને નિયંત્રણમાં રાખે
તકમરિયા વજન નિયંત્રણમાં રાખવા માટે જાણીતા છે. તેને પાણીમાં પલાડવાથી બીજ ફુલીને જેલી જેવા બની જાય છે તેનાથી તેમાં ફાઇબરની માત્રામાં વધારો થાય છે. આ પાણી પીવાથી તમને લાંબા સમય સુધી પેટ ભરેલું લાગે છે. તેથી તમને બિનજરૂરી નાસ્તા ખાવાનું મન થશે નહીં અને તમારો ખોરાક નિયંત્રણમાં રહેશે. તેમજ આ બીજમાં કૅલેરીનું પ્રમાણ અતિશય નીચું હોય છે અને પોષકતત્વો વધુ હોવાથી તે તમારી વજન ઘટાડવામાં ખુબ મદદરૂપ થઈ શકે છે.
બ્લડ શુગરને જાળવી રાખે છે
જેમને ડાયાબિટીસ છે અથવા તો જેઓ શરીરમાં બ્લડ શુગર લેવલને જાળવી રાખવા માગે છે તેમના માટે તકમરિયાથી ઘણો ફાયદો થઈ શકે છે. તેમાં રહેલું ફાઇબર પાચનને ધીમું પાડે છે અને તેથી શરીરમાં કાર્બોહાઇડ્રેડ્ઝનું પ્રમાણ વધતું નથી, જે બ્લડ શુગર લેવલને અચાનક વધતું અટકાવે છે. સવારે જો તકમરિયાનું પાણી પીવામાં આવે તો તે સમયાંતરે શરીરમાં જરૂર મુજબ ગ્લુકોઝ પેદા કરે છે, જે ડાયાબિટીસને કાબૂમાં રાખવા ખુબ ઉપયોગી છે.
શરીરમાં હાઇડ્રેશન સુધારશે
તકમરિયાના બીજ તેનાં વજન કરતાં 30 ગણું પાણી શોષવાની ક્ષમતા ધરાવે છે, તેથી તે સૌથી શ્રેષ્ઠ હાઇડ્રેશન ડ્રિંક બની શકે છે. શરીરને કામ કરવા માટે તેમાં પ્રવાહીનું પ્રમાણ જળવાવું પણ બહુ અગત્યનું છે, તેનાથી પાચન, શરીરમાં લોહી અને પાણીની પ્રવાહીતા, શરીરનું તાપમાન જાળવવા વગેરે મદદરૂપ થાય છે. સાથે જ તમારા શરીરની ઊર્જા પણ વધે છે અને તમને આખો દિવસ કામ કરવામાં થાક લાગતો નથી.
શરીરને ડિટોક્સ કરે છે
તકમરિયા શરીરનાં બધાં જ કચરાને બહાર કાઢીને શરીરને ડિટોક્સ કરવામાં મદદ કરે છે. તેનાથી વધુ પેશાબ થાય છે, જે શરીરમાંથી બિનજરૂરી કચરાને બહાર ધકેલવાનું કામ કરે છે. તેથી ખાલી પેટે તકમરિયાનું પાણી લીવર અને કીડનીને શુદ્ધ કરવાનું પણ કામ કરે છે, તેનાથી તમારું સર્વાંગી સ્વાસ્થ્ય સુધરે છે.
ત્વચાને કોમળ બનાવે છે
તકમરિયામાં એન્ટિઓક્સિડન્ટ્સનું પ્રમાણ ભરપુર હોય છે જે શરીરમાંથી ઓક્સિડેટિવ સ્ટ્રેસ દૂર કરે છે. તેનાથી વધતી ઉંમર અને ત્વચાને લગતી ઘણી સમસ્યાઓમાં ફાયદો થાય છે. જેમકે, તકમરિયાથી સોજાં ઘટે છે, જે ખીલ ને ફોલ્લીઓ કે ડાઘ દૂર કરીને ત્વચાને સુંવાળી બનાવે છે. તકમરિયાના પાણીથી તમારી ત્વચા સાફ, ચમકતી અને સ્નિગ્ધ બને છે, જે અંદર અને બહાર પણ ત્વચાની તંદુરસ્તી વધારે છે.
રોગપ્રતિકારક શક્તિ વધારે
વિટામિન, એન્ટિઓક્સિડન્ટ્સ સહિત અન્ય તત્વોનું વધારે પ્રમાણ રોગપ્રતિકારક શક્તિ વધારવાનું કામ કરે છે. તેનું નિયમિત સેવન રોગપ્રતિકારક શક્તિને વધુ મજબૂત બનાવે છે, તેનાથી તમારું શરીર કેટલાંક ચેપી રોગો અને બીમારીઓથી સુરક્ષિત રહે છે. તકમરિયામાં બેક્ટેરિયા અને વાયરસથી બચાવવાની ક્ષણતા રહેલી છે.
હ્રદયની તંદુરસ્તી વધારે છે
તકમરિયામાં ઓમેગા 3 ફેટી એસિડ હોય છે, જે હ્રદયના આરોગ્યને વધારે છે. તે ચરબી વધતી અટકાવે છે અને ખરાબ કોલેસ્ટ્રોલને વધતો અટકાવે છે તેમજ સારા કોલેસ્ટ્રોલનું પ્રમાણ વધારે છે. તકમરિયાના પાણીથી કાર્ડિયોવસ્ક્યુલર હેલ્થને ટેકો મળે છે જે હ્રદયની બીમારીથી બચાવીને તંદુરસ્ત લોહીના પ્રવાહને જાળવી રાખે છે.
સ્ટ્રેસ અને એન્ક્ઝાઇટી ઘટાડે છે
તકમરિયામાં એડપ્ટોજેનિક તત્વો હોય છે, તેનો અર્થ એ થયો કે તે શરીરના સ્ટ્રેસ સ્વીકારીને મનને શાંત કરવામાં મદદ કરે છે. તકમરિયામાં રહેલાં મેગ્નેશિયમ અને અન્ય તત્વો શરીરની ન્યુટ્રીટ્રાન્સમિટર એક્ટિવિટીને નિયંત્રિત રાખે છે તેનાથી એન્ક્ઝાઈટી ઘટે છે અને રિલેક્સ રહી શકાય છે.