ગુજરાત વંદન

સંદેશખાલી કેસમાં આવ્યો નવો વળાંક: એક મહિલાએ કર્યો દાવો, કહ્યું- આવાસ યોજનામાં નામ સામેલ કરવાનું કહી સહી કરાવડાવી

09 May, 2024

પશ્ચિમ બંગાળના સંદેશખાલીની રહેવાસી ત્રણમાંથી એક મહિલાએ તૃણમૂલ કોંગ્રેસના નેતાઓ સામે મૂકેલા દુષ્કર્મના આરોપો પાછા ખેંચી લેતાં નવી ચર્ચા શરૂ થઈ છે. પશ્ચિમ બંગાળના ઉત્તર 24 પરગણા જિલ્લાના સંદેશખાલીની રહેવાસી મહિલાએ આરોપ પાછો ખેંચતાં કહ્યું કે મારી પર દુષ્કર્મ થયું જ નથી. તેણે આરોપ લગાવ્યો કે ભાજપના સભ્યોએ મારા પાસે એક કોરા કાગળ પર સહી કરાવી અને પછી પોલીસનો સંપર્ક સાધ્યો હતો.

એક અહેવાલ અનુસાર મહિલાએ દાવો કરતા કહ્યું કે ભાજપે મારા પર કોરા કાગળો પર સહી કરવા અને દુષ્કર્મની ફરિયાદ નોંધાવવા દબાણ કર્યું હતું. ઉલ્લેખનીય છે કે ખોટા આરોપો પાછા ખેંચવા બદલ હવે મહિલાએ ધમકીઓ અને સામાજિક બહિષ્કારનો સામનો કરવાનો વારો આવ્યો છે. આ અંગે મહિલાએ સંદેશખાલી પોલીસ સ્ટેશનમાં એક નવી ફરિયાદ પણ નોંધાવી છે. નોંધનીય છે કે સંદેશખાલીમાં મહિલાઓ પર દુષ્કર્મનો કથિત કિસ્સો પ્રકાશમાં આવતાં ભારે હોબાળો મચી ગયો હતો.

મહિલાના જણાવ્યા પ્રમાણે સ્થાનિક ભાજપ મહિલા મોરચાના અધિકારીઓ અને અન્ય પાર્ટીના સભ્યો તેના ઘરે આવ્યા હતા. આ પછી તેને નકલી ફરિયાદ પર સહી કરવાનું કહેવામાં આવ્યું હતું. આ અંગે મહિલાએ આક્ષેપ કરતા કહ્યું કે એ લોકોએ આવાસ યોજનામાં મારું નામ સામેલ કરવાના બહાને મારી સહી લીધી હતી. બાદમાં મને પોલીસ સ્ટેશન લઈ ગયા, જ્યાં મને દુષ્કર્મની ફરિયાદ નોંધાવવાનું કહેવામાં આવ્યું હતું. TMC ઓફિસમાં મારી કોઈ જાતીય સતામણી કરાઈ જ નથી. આ સિવાય મને ક્યારેય મોડી રાતે પાર્ટી ઓફિસ જવા દબાણ કરાયું જ નથી.

ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ‎

https://shorturl.at/hjzN0