ગુજરાત વંદન

રાજ્યના વાતવરણમાં અચાનક મોટો પલટો: અમદાવાદમાં ધૂળની ડમરીઓ ઉડી; ભાવનગર, બોટાદ, અમરેલી, વલસાડ, હિંમતનગર, મહેસાણા, સુરેન્દ્રનગર, અરવલ્લીમાં વરસાદ

13 May, 2024

રાજ્યના વાતાવરણમાં અચાનક જ પલટો જોવા મળ્યો છે. તીવ્ર ગરમીની વચ્ચે આજે ગુજરાતના અનેક વિસ્તારોમાં વરસાદ થયો છે. ભાવનગર, બોટાદ, અમરેલી, વલસાડ, સાબરકાંઠા-હિંમતનગર, બનાસકાંઠા, મહેસાણા, સુરેન્દ્રનગર, અરવલ્લી, ડાંગ સહિતના જિલ્લાઓ અને સંઘપ્રદેશ દાદરાનગર હવેલીમાં વરસાદ પડ્યો છે. જ્યારે અમદાવાદમાં રસ્તા પર ધૂળની ડમરીઓ ઉડી રહી છે. ગ્રામ્ય વિસ્તારોમાં વરસાદ શરૂ થતા ખેડૂતોમાં ચિંતા વ્યાપી છે. ઉલ્લેખનીય છે કે અરબ સાગરમાં અપર એર સાયક્લોનિક સિસ્ટમ સક્રિય થતા વરસાદની આગાહી છે.

હવામાન વિભાગ દ્વારા નાઉકાસ્ટ જાહેર કરાયું છે. કાળઝાળ ગરમી વચ્ચે આગામી 3 કલાક ભારે પવન સાથે ગુજરાતમાં વરસાદની આગાહી કરાઈ છે. જેમાં બનાસકાંઠા, સાબરકાંઠા, અરવલ્લી, પાટણ, મહેસાણા, અમદાવાદ, ભરૂચ, ડાંગ, તાપી, નવસારી, વલસાડ, દમણ, દાદરાનગર હવેલી, અમરેલી, ભાવનગર અને બોટાદમાં ભારે પવન સાથે વરસાદ પડશે.

ભાવનગર જિલ્લાના સિહોર તાલુકાના ગામોમાં ગાજવીજ સાથે કમોસમી વરસાદ પડ્યો હતો. સિહોરના બોરડી, ટાણા, જાંબાળા, કાજાવદર, સણોસરા, ઈશ્વરિયા, આબલા સહિતના ગામોમાં કરા સાથે વરસાદ વરસ્યો હતો. તો બીજી તરફ કરા સાથે વરસાદ પડતા પાકને નુકસાન થવાની પણ ભીતિ સેવાઈ રહી છે. બોટાદ શહેર અને બરવાળામાં પણ વરસાદ વરસ્યો છે.

ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ‎

https://shorturl.at/hjzN0