CM Yogi attacks Samajwadi Party: ગોરખપુરમાં સમાજવાદી પાર્ટી (સપા)ના અધ્યક્ષ અખિલેશ યાદવના રોડ શો દરમિયાન ભાજપ નેતાના 13 વર્ષીય પુત્રનો જીવ ગુમાવ્યાની ઘટના બાદ ઉત્તર પ્રદેશનું રાજકારણ ગરમાયું છે. મુખ્યમંત્રી યોગી આદિત્યનાથે આ ઘટના અંગે સપા પર આકરા પ્રહાર કર્યા છે અને આરોપીઓ સામે કડક કાર્યવાહી કરવાની ચીમકી આપી છે.
'સપાની અરાજકતાએ માસૂમનો જીવ લીધો': યોગી
ગોરખપુરમાં 491 કરોડ રૂપિયાના ખર્ચે નિર્માણ પામનારી ફોરેસ્ટ યુનિવર્સિટીના શિલાન્યાસ સમારોહમાં જનસભાને સંબોધતા મુખ્યમંત્રી યોગી આદિત્યનાથે સપા પર નિશાન સાધ્યું હતું. મુખ્યમંત્રીએ કહ્યું કે, "સપાની પીડીએ (PDA) યાત્રા દરમિયાન એક માસૂમ બાળકનો જીવ ગયો, પરંતુ સપા નેતાઓ પાસે સંવેદનાના બે શબ્દો પણ નથી. આખરે તે માસૂમનો શું વાંક હતો?" મુખ્યમંત્રીએ વહીવટીતંત્રને આરોપીઓને શોધી કાઢવા આદેશ આપ્યા હોવાનું જણાવતા કહ્યું કે, ગુનેગારો અને માફિયાઓને કાયદાના દંડાથી સીધા કરવામાં આવશે અને કોઈ પણ આરોપી બચશે નહીં.
સપા માફિયાઓને પોષે છેઃ યોગી
વર્ષ 2017 પહેલાના શાસનનો ઉલ્લેખ કરતા CM યોગીએ સપા પર માફિયાઓને પોષવાનો આરોપ લગાવ્યો હતો અને જણાવ્યું હતું કે તેઓ પીડિત પરિવારની મુલાકાત લેશે.
અસદુદ્દીન ઓવૈસી પર પણ સાધ્યું નિશાન
જનસભા દરમિયાન સીએમ યોગીએ AIMIMના વડા અસદુદ્દીન ઓવૈસી પર પણ પ્રહાર કર્યા હતા. તેમણે જણાવ્યું હતું કે હૈદરાબાદના એક નેતા હાલ ઘણા ઉત્સાહમાં છે, પરંતુ 2027ની યુપી વિધાનસભા ચૂંટણીના પરિણામો બાદ હૈદરાબાદનું નામ 'ભાગ્યલક્ષ્મીપુરમ' કરવાની ભેટ આપવામાં આવશે.
શું હતી સમગ્ર ઘટના?
મળતી માહિતી મુજબ, બુધવારે બપોરે લગભગ 1 વાગ્યે ગોરખપુરના કેન્ટ પોલીસ સ્ટેશન વિસ્તારના ઝારખંડી ખાતે જેસીબી (JCB)ની અડફેટે આવવાથી ચોરીચોરા વિસ્તારના ભાજપ નેતા ઓમકાર સિંહના 13 વર્ષીય પુત્ર આર્યવર્ધન સિંહનું મોત નીપજ્યું હતું. પરિવારજનોનો આક્ષેપ છે કે આ જેસીબી અખિલેશ યાદવના રોડ શોમાંથી પરત ફરી રહ્યું હતું. અકસ્માત બાદ વિદ્યાર્થીને તાત્કાલિક AIIMS લઈ જવાયો હતો, જ્યાં તબીબોએ તેને મૃત જાહેર કર્યો હતો. આ ઘટના બાદ સ્થાનિક લોકો અને પરિવારજનોએ રસ્તા પર બેસી વિરોધ પ્રદર્શન પણ કર્યું હતું.








