Saurabh Das School Thik Karo campaign: "જ્ઞાનેશ કુમાર રાજીનામું નહીં આપે ત્યાં સુધી જંપીને બેસીશું નહીં અને અન્ય કોઈ મુદ્દાની વાત નહીં કરીએ" — થોડા સમય પહેલાં આવા આક્રમક દાવા કરનાર કોકરોચ જનતા પાર્ટી (CJP)ના વલણમાં હવે મોટો બદલાવ જોવા મળી રહ્યો છે. જે મુહિમને 'હાલ કોઈ ફાયદો નથી' તેમ કહીને પડતી મૂકવામાં આવી હતી, તે જ 'સ્કૂલ ઠીક કરો' અભિયાન સાથે CJPના સહ-સંયોજક સૌરભ દાસ ફરી મેદાનમાં ઉતર્યા છે.
ફરી શરૂ થયું 'સ્કૂલ ઠીક કરો' અભિયાન
અગાઉ 24 સપ્ટેમ્બરે CJP દ્વારા 'સ્કૂલ ઠીક કરો' અને 'આદિવાસી સ્કૂલ ઠીક કરો' જેવા અભિયાનો સ્થગિત કરીને મુખ્ય ચૂંટણી કમિશનર જ્ઞાનેશ કુમાર સામે આંદોલન પર સંપૂર્ણ ધ્યાન કેન્દ્રિત કરાયું હતું. જોકે, હવે સૌરભ દાસે પોતાની ટીમ સાથે બુધવારે દિલ્હીની બે શાળાઓની મુલાકાત લીધી હતી, જ્યારે અન્ય શાળાઓમાં તેમની ટીમના સભ્યો પહોંચ્યા હતા. ગુરુવારે તેમણે ઉત્તર પ્રદેશની એક શાળાની તસવીર શેર કરીને અભિયાન આગળ ધપાવવાની માહિતી આપી છે.
પીસ બોન્ડ અને કાયદાકીય અડચણો
2 ઓક્ટોબરે મુંબઈમાં પ્રદર્શન બાદ 10 ઓક્ટોબરે દિલ્હીમાં એકત્ર થવાની જાહેરાત કરાઈ હતી, પરંતુ દિલ્હી પોલીસે એરપોર્ટ પર જ નેતાઓને હિરાસતમાં લીધા હતા. ત્યારબાદ જંતર-મંતર ખાતે ગેરકાયદે પ્રવેશ મામલે સૌરભ દાસ અને આશુતોષ રાંકાને જેલમાં જવું પડ્યું હતું. જેલમાંથી બહાર આવવા નેતાઓએ પીસ બોન્ડ ભર્યા હોવાથી રસ્તા પર ઉતરીને આંદોલન ચલાવવામાં મુશ્કેલી ઊભી થઈ હોવાનું મનાય છે.
અભિજીત દીપકેની મૌન ધારણ કરતાં ચર્ચાઓ
CJPના વડા અભિજીત દીપકેએ શરૂઆતમાં દિવાળી સુધી આંદોલન બ્રેક પર હોવાનું જણાવ્યું હતું, પરંતુ દિવાળીના દસ દિવસ બાદ પણ આંદોલનની આગળની રણનીતિ અંગે કોઈ સ્પષ્ટતા કરાઈ નથી. ૧૨ નવેમ્બર બાદ તેઓ સોશિયલ મીડિયા પર પણ નિષ્ક્રિય જોવા મળી રહ્યા છે. બીજી તરફ, પક્ષ દ્વારા 'કોકરોચ ક્લબ' શરૂ કરવાની જાહેરાત કરાઈ છે, પરંતુ મુખ્ય ચૂંટણી કમિશનર સામેના આંદોલન પર છવાયેલી ચૂપકીદીને લઈને રાજકીય વર્તુળોમાં અનેક તર્ક-વિતર્ક સર્જાયા છે.








