Himachal Bir Billing Paragliding Accident: હિમાચલ પ્રદેશના કાંગડા જિલ્લામાં આવેલું બીડ-બિલિંગ (Bir-Billing) સમગ્ર વિશ્વમાં પેરાગ્લાઈડિંગ માટે પ્રખ્યાત છે, પરંતુ તાજેતરમાં આ સ્થળ એક ગમખ્વાર અકસ્માતને કારણે ચર્ચામાં આવ્યું છે. ઉત્તર પ્રદેશના ગ્રેટર નોઈડા વિસ્તારમાં રહેતો 26 વર્ષીય યુવક શુભમ ડોભિયાલ પોતાની બહેન અને અન્ય પરિવારજનો સાથે હિમાચલ પ્રદેશ રજાઓ ગાળવા માટે ગયો હતો. પરિવાર માટે આ ખુશીનો પ્રવાસ થોડીવારમાં જ એક કાળઝાળ દુઃખમાં ફેરવાઈ ગયો, જ્યારે ટેક-ઓફ કર્યાની માત્ર 6 મિનિટની અંદર જ શુભમ પેરાગ્લાઈડરમાંથી અચાનક નીચે પટકાયો હતો. આ ભયાનક અકસ્માતમાં યુવકનું ઘટનાસ્થળે જ કરુણ મૃત્યુ નીપજ્યું હતું, જેના કારણે સમગ્ર પરિવાર અને પ્રવાસન જગતમાં શોકની લહેર છવાઈ ગઈ છે.
ઉડાન ભર્યાની છ મિનિટમાં જ હવામાંથી ગાઢ જંગલમાં ખાબક્યો યુવક
પ્રાપ્ત વિગતો અનુસાર, શુભમ ડોભિયાલે બિલિંગ ટેક-ઓફ સાઇટ પરથી સ્થાનિક પાયલોટ વિનય કુમાર સાથે ટૅન્ડમ પેરાગ્લાઈડિંગ (Tandem Paragliding) માટે ઉડાન ભરી હતી. ઉડાન શરૂ થયાની માંડ 6 મિનિટ થઈ હશે ત્યાં અચાનક હવામાં જ કોઈક ટેક્નિકલ ખામી સર્જાઈ અથવા સેફ્ટી બેલ્ટ છૂટો પડી જવાથી શુભમ નીચે ગાઢ જંગલ વિસ્તારમાં ફેંકાયો હતો. ચોંકાવનારી વાત એ છે કે શુભમના પરિવારના અન્ય સભ્યોએ પણ તેની સાથે જ પેરાગ્લાઈડિંગ કર્યું હતું અને તેઓ જ્યારે સુરક્ષિત રીતે નીચે લેન્ડિંગ સાઇટ પર પહોંચ્યા, ત્યારે તેમને આ ગોઝારી ઘટના વિશે જાણ થઈ હતી. આ દુર્ઘટના બાદ પાયલોટ હેમખેમ નીચે ઉતરી આવ્યો હતો અને તેણે અન્ય લોકોને મુસાફર પડી ગયાની જાણ કરી હતી.
કલાકોની ભારે જહેમત બાદ રેસ્ક્યૂ ટીમ દ્વારા મૃતદેહ કરાયો રેસ્ક્યૂ
યુવક હવામાંથી નીચે પડ્યાની જાણ થતાં જ સ્થાનિક પ્રશાસન, પોલીસ અને બચાવ ટીમો તાત્કાલિક હરકતમાં આવી ગઈ હતી. ઘટનાસ્થળે પહોંચીને ગાઢ જંગલ અને ડુંગરાળ પ્રદેશમાં રેસ્ક્યૂ ઓપરેશન શરૂ કરવામાં આવ્યું હતું. અંધારું થવા છતાં અને અત્યંત મુશ્કેલ ભૌગોલિક પરિસ્થિતિ વચ્ચે પણ બચાવ ટીમોએ ભારે જહેમત ઉઠાવી હતી. મોડી સાંજે સઘન શોધખોળ બાદ નિર્ધારિત લેન્ડિંગ સાઇટ નજીકના જંગલમાંથી શુભમનો નિર્જીવ દેહ મળી આવ્યો હતો. યુવકને તાત્કાલિક હોસ્પિટલ પહોંચાડવામાં આવ્યો હતો, જ્યાં ડૉક્ટરોએ તેને મૃત જાહેર કર્યો હતો.
પાયલોટ વિરુદ્ધ ગંભીર ગુનો દાખલ, પોલીસ દ્વારા કાયદાકીય તપાસ શરૂ
આ ગંભીર દુર્ઘટના મામલે કાંગડા જિલ્લાના પોલીસ અધિક્ષક (SP) કુલભૂષણ વર્માએ જણાવ્યું કે, મૃતકના પરિવારજનો અને પ્રત્યક્ષદર્શીઓના નિવેદનના આધારે કડક પગલાં લેવામાં આવ્યા છે. બીડ પોલીસ સ્ટેશન ખાતે પાયલોટ વિનય કુમાર (રહેવાસી કોટલી, બૈજનાથ) વિરુદ્ધ ભારતીય ન્યાય સંહિતા (BNS) ની કલમ 125 અને 106 હેઠળ ગુનો નોંધીને એફઆઈઆર (FIR) દાખલ કરવામાં આવી છે. પોલીસ પ્રાથમિક તપાસમાં એ આશંકા વ્યક્ત કરી રહી છે કે ઉડાન દરમિયાન સેફ્ટી હાર્નેસ અથવા બેલ્ટ યોગ્ય રીતે લૉક કરવામાં આવ્યો ન હતો અથવા તેમાં કોઈ મોટી ગંભીર બેદરકારી રહી હતી.
એડવેન્ચર સ્પોર્ટ્સની સુરક્ષા વ્યવસ્થા સામે ઊભા થયા સવાલો
વિશ્વના અગ્રણી પેરાગ્લાઈડિંગ ડેસ્ટિનેશન ગણાતા બીડ-બિલિંગમાં વારંવાર બનતી આવી દુર્ઘટનાઓએ પ્રવાસીઓની સુરક્ષા પર મોટો પ્રશ્નાર્થ ચિન્હ મૂક્યો છે. કાંગડાના ડેપ્યુટી કમિશનર હેમરાજ બૈરવાએ જણાવ્યું છે કે એડવેન્ચર પ્રવૃત્તિઓમાં પ્રવાસીઓ સંપૂર્ણપણે પાયલોટ અને ઉપકરણો પર ભરોસો મૂકતા હોય છે, જેથી આવા ક્ષેત્રોમાં સુરક્ષાના તમામ નિયમોનું ચુસ્તપણે પાલન કરવું અનિવાર્ય છે. આ મામલે ટેક્નિકલ નિષ્ણાતોની મદદ લઈને દરેક એંગલથી ઊંડાણપૂર્વક તપાસ હાથ ધરવામાં આવી છે જેથી ભવિષ્યમાં આવા જીવલેણ અકસ્માતો અટકાવી શકાય.
