French Riots Over Inflation and Inequality Sparks: ફ્રાંસની રાજધાની પેરિસ સહિત દેશના અનેક મોટા શહેરોમાં જીવનજરૂરી ચીજવસ્તુઓના વધતા ભાવ, શાળાઓની જર્જરિત હાલત અને વધતી આર્થિક અસમાનતાના વિરોધમાં લાખો લોકો રસ્તા પર ઉતરી આવ્યા છે. આ પ્રદર્શનોએ ઉગ્ર સ્વરૂપ ધારણ કરી લીધું છે, જેના કારણે ઠેરઠેર તોડફોડ, લૂંટફાટ અને હિંસક અથડામણો જોવા મળી છે. પરિસ્થિતિને કાબૂમાં લેવા માટે સરકારે ભારે સુરક્ષા ફોર્સ તૈનાત કરવી પડી છે અને આંદોલન હવે આંતરરાષ્ટ્રીય સ્તરે ચર્ચાનો વિષય બન્યું છે.
શાળાઓની ખરાબ હાલત અને મોંઘવારી સામે ફાટી નીકળ્યો રોષ
ફ્રાંસમાં આ વિરોધ પ્રદર્શનોની શરૂઆત મુખ્યત્વે શાળાઓની નબળી સ્થિતિ, શિક્ષકોની અછત અને શિક્ષણ ક્ષેત્રે થયેલા ભારે ફી વધારા સામે વિદ્યાર્થીઓ દ્વારા કરવામાં આવી હતી. જોતજોતામાં આ આંદોલન સાથે સામાન્ય જનતા પણ મોટી સંખ્યામાં જોડાઈ ગઈ હતી. રોજબરોજની ખાધ્ય સામગ્રી, વીજળી, ગેસ અને ઉર્જાના સતત વધી રહેલા ભાવ તેમજ સામાન્ય નાગરિકો માટે વધતી જતી આર્થિક અસમાનતાએ લોકોના ગુસ્સાને ચરમસીમા પર પહોંચાડી દીધો છે. પ્રદર્શનકારીઓનું કહેવું છે કે મોંઘવારીના કારણે સામાન્ય વર્ગનું જીવન જીવવું મુશ્કેલ બની ગયું છે.
પેરિસથી લઈને માર્સીલે સુધી વ્યાપક હિંસા અને અરાજકતા
પેરિસમાં પ્રદર્શનની શરૂઆત શાંતિપૂર્ણ રીતે થઈ હતી, પરંતુ કૂચ પૂરી થવાના સમયે માહોલ તણાવપૂર્ણ બન્યો અને દેખાવકારો તોફાને ચઢ્યા હતા. પ્રદર્શનકારીઓએ જાહેર મકાનોમાં ભારે તોડફોડ કરી હતી તેમજ મોટા શોપિંગ મોલ્સ અને દુકાનોમાં લૂંટફાટ ચલાવી હતી. આ અરાજકતા માત્ર પેરિસ પૂરતી મર્યાદિત ન રહેતા માર્સીલે, લીયોન, બોર્ડોકસ, લીલે અને નાન્તેઝ જેવા અન્ય મુખ્ય શહેરોમાં પણ ફેલાઈ ગઈ હતી. રસ્તાઓ પર વાહનો સળગાવવાની અને પથ્થરબાજીની ઘટનાઓને કારણે ઠેરઠેર અફરાતફરીનો માહોલ સર્જાયો હતો.
70 હજાર પોલીસ જવાનો તૈનાત, ટીયર ગેસ અને વોટર કેનનનો ઉપયોગ
દેશમાં ફેલાયેલી આ અરાજકતાને ડામવા માટે ફ્રાંસ સરકારે સુરક્ષા વ્યવસ્થા સઘન બનાવીને આશરે 70,000 જેટલા પોલીસ જવાનોને મેદાને ઉતાર્યા હતા. પ્રદર્શનકારીઓને કાબૂમાં લેવા માટે પોલીસ દ્વારા પહેલા લાઠીચાર્જ કરવામાં આવ્યો હતો અને સ્થિતિ વધુ વણસતા ટીયર ગેસના શેલ તેમજ વોટર કેનનનો ભારે ઉપયોગ કરાયો હતો. સત્તાવાળાઓના જણાવ્યા અનુસાર દેશભરમાં આશરે 4.10 લાખ લોકો આ પ્રદર્શનોમાં સામેલ થયા હતા, જ્યારે આંદોલનના આયોજકોનો દાવો છે કે આ સંખ્યા 8 લાખથી પણ વધુ હતી. સુરક્ષા દળોએ કડક કાર્યવાહી કરીને 1000થી વધુ લોકોની ધરપકડ કરી છે.
ડાબેરી અને જમણેરી સમૂહો વચ્ચે ટક્કરથી આંદોલનને મળ્યું રાજકીય સ્વરૂપ
આ સામાજિક આંદોલન હવે ધીમે-ધીમે ગંભીર રાજકીય રંગ પકડી રહ્યું છે. વિરોધ પ્રદર્શનોમાં 'બ્લેક શર્ટસ' તરીકે ઓળખાતા ડાબેરી સમૂહો અને તેમની સામે મેદાને પડેલી મરીજલ-પેનની ફાર-રાઇટ પાર્ટીના 'યલો શર્ટસ' સમર્થકો વચ્ચે પણ તણાવ જોવા મળ્યો છે. ફ્રાંસના આ આંતરિક સંઘર્ષની અસર હવે સ્પેન, ઇટાલી અને આર્જેન્ટીના સુધી જોવા મળી રહી છે. આ સમગ્ર સ્થિતિને કારણે રાષ્ટ્રપતિ મેક્રોનની સરકાર સામે સવાલો ઉભા થઈ રહ્યા છે અને આ આંદોલન અમીર અને ગરીબ વચ્ચેના સંઘર્ષનું મોટું રૂપ લેતું જઈ રહ્યું છે.
