Shobana Ramayana movie Ravana mother Kaikesi: બોલિવૂડ ડિરેક્ટર નિતેશ તિવારીની આગામી મેગાબજેટ ફિલ્મ 'રામાયણ'ની જાહેરાત થઈ ત્યારથી જ દર્શકો અને સમીક્ષકોમાં ભારે ઉત્કંઠા જોવા મળી રહી છે. રણબીર કપૂર (ભગવાન રામ) અને સાઉથના સુપરસ્ટાર યશ (રાવણ) જેવા દિગ્ગજો વચ્ચે એક એવી અભિનેત્રીની એન્ટ્રી થઈ છે જેણે સૌનું ધ્યાન ખેંચ્યું છે. અમે વાત કરી રહ્યા છીએ સાઉથ સિનેમાની દિગ્ગજ અભિનેત્રી શોભનાની, જે આ મહાકાવ્ય આધારિત ફિલ્મમાં રાવણની માતા 'કૈકેસી'નું અત્યંત મહત્વપૂર્ણ પાત્ર ભજવી રહી છે. 40 વર્ષથી વધુના કરિયરમાં 200થી વધુ ફિલ્મો કરનાર શોભનાને તાજેતરમાં જ પદ્મ ભૂષણથી સન્માનિત કરવામાં આવ્યા હતા.
કોણ છે શોભના?
શોભનાનો જન્મ 21 માર્ચ 1970ના રોજ કેરળમાં થયો હતો. તેના માતા-પિતાનું નામ ચંદ્રકુમાર પિલ્લઈ અને આનંદમ પિલ્લઈ છે. શોભનાનો સીધો સંબંધ દક્ષિણ ભારતના પ્રખ્યાત 'ટ્રાવણકોર પરિવાર' સાથે છે. તે જાણીતી 'ટ્રાવણકોર સિસ્ટર્સ' એટલે કે લલિતા, પદ્મિની અને રાગિણીની ભત્રીજી થાય છે. આ ત્રણેય બહેનો અભિનયની સાથે સાથે શાસ્ત્રીય નૃત્યમાં પણ પારંગત હતી. પ્રખ્યાત અભિનેત્રી પાર્વતી અને અભિનેતા વિનીત શોભનાના પિતરાઈ ભાઈ-બહેન છે. અંગત જીવનની વાત કરીએ તો, શોભનાએ ક્યારેય લગ્ન કર્યા નથી અને તે સિંગલ મધર તરીકે પોતાની દત્તક લીધેલી દીકરી અનંતા નારાયણીનો ઉછેર કરી રહી છે. તે પોતાની અંગત જિંદગી મીડિયાથી દૂર રાખવાનું જ પસંદ કરે છે.
બાળ કલાકારથી શરૂઆત અને દક્ષિણ ભારતીય સિનેમા પર રાજ
શોભનાએ કેમેરા સામે પોતાની સફર બાળ કલાકાર તરીકે શરૂ કરી હતી. વર્ષ 1980માં આવેલી ફિલ્મ 'મંગલા નાયકી'માં તેના અભિનયના ખૂબ વખાણ થયા હતા અને તેને પહેલો પુરસ્કાર પણ મળ્યો હતો. 1984માં ડિરેક્ટર બાલચંદ્ર મેનનની ફિલ્મ 'એપ્રિલ 18'માં તેણે મુખ્ય અભિનેત્રી તરીકે ડેબ્યૂ કર્યું હતું. ત્યારબાદ તેણે પાછું વળીને જોયું નથી. પોતાના લાંબા અને સફળ કરિયરમાં તેણે 'કનમરાયથુ', 'ચરિત્રમ', 'મણિચિત્રથાઝુ', 'થીરા' અને 'થુડરુમ' જેવી અનેક ઐતિહાસિક ફિલ્મો આપીને દક્ષિણ ભારતીય સિનેમામાં પોતાનું એક આગવું સ્થાન જમાવ્યું છે.
બે વખત નેશનલ એવોર્ડ અને દેશનું ત્રીજું સર્વોચ્ચ નાગરિક સન્માન 'પદ્મ ભૂષણ'
પોતાના સહજ અને શ્રેષ્ઠ અભિનય માટે શોભનાને રાષ્ટ્રીય સ્તરે પણ મોટી ઓળખ મળી છે. વર્ષ 1993માં રિલીઝ થયેલી બ્લોકબસ્ટર ફિલ્મ 'મણિચિત્રથાઝુ' (જેની હિન્દી રિમેક 'ભૂલ ભુલૈયા' છે) માં તેના અદભુત પ્રદર્શન માટે તેને પહેલો 'રાષ્ટ્રીય ફિલ્મ પુરસ્કાર'મળ્યો હતો. ત્યારબાદ 2001માં 'મિત્ર, માય ફ્રેન્ડ' માટે તેને બીજી વખત શ્રેષ્ઠ અભિનેત્રીનો રાષ્ટ્રીય પુરસ્કાર એનાયત થયો. કલાક્ષેત્રે તેના ઉત્કૃષ્ટ યોગદાન બદલ ભારત સરકારે તેને અગાઉ પદ્મશ્રી અને ગયા વર્ષે દેશના ત્રીજા સર્વોચ્ચ નાગરિક સન્માન 'પદ્મ ભૂષણ'થી નવાજી છે. આ ઉપરાંત કેરળ સ્ટેટ એવોર્ડ અને ફિલ્મફેર એવોર્ડ્સની તો કોઈ ગણતરી જ નથી.
600થી વધુ શિષ્યોને આપી તાલીમ
અભિનયની દુનિયામાં ટોચ પર હોવા છતાં શોભનાનો પહેલો પ્રેમ હંમેશા નૃત્ય રહ્યો છે. તેણે ચિત્રા વિશ્વેશ્વરન અને પદ્મા સુબ્રહ્મણ્યમ જેવા દિગ્ગજ ગુરુઓ પાસેથી ભરતનાટ્યમની દીક્ષા લીધી છે. વર્ષ 1991માં તેણે 'કલાર્પણ' નામની પોતાની ડાન્સ ઈન્સ્ટિટ્યૂટ શરૂ કરી હતી. આ સંસ્થા દ્વારા તે નવી પેઢીને માત્ર નૃત્ય જ નહીં, પરંતુ તેના આધ્યાત્મિક અને બૌદ્ધિક પાસાંઓ પણ શીખવી રહી છે. અત્યાર સુધીમાં અહીંથી 600થી વધુ વિદ્યાર્થીઓ તાલીમ લઈ ચૂક્યા છે.
પૌરાણિક કથામાં કૈકેસી કોણ હતી?
વાલ્મીકિ રામાયણ અનુસાર, કૈકેસી એ દૈત્યરાજ સુમાલી અને કેતુમતીની પુત્રી હતી, જેના લગ્ન ઋષિ વિશ્રવા સાથે થયા હતા. તે રાવણ, કુંભકર્ણ, વિભીષણ અને શૂર્પણખાની માતા હતી. નિતેશ તિવારીની આધુનિક VFXથી સજ્જ રામાયણમાં શોભના આ જટિલ અને મહત્વપૂર્ણ પાત્રમાં જોવા મળશે. ફિલ્મમાં યશ મુખ્ય રાવણના રોલમાં છે, જ્યારે નિર્માતા નમિત મલ્હોત્રાનો પુત્ર રાઘવ યુવાન રાવણનું પાત્ર ભજવી રહ્યો છે. શોભનાનો આ રોલ રાવણના પ્રારંભિક જીવન અને તેના પાત્ર ઘડતરને દર્શાવવામાં ચાવીરૂપ સાબિત થશે. દર્શકો શોભના અને યશને માતા-પુત્ર તરીકે સ્ક્રીન પર જોવા ખૂબ જ ઉત્સુક છે.
