રાજપાલ યાદવ જઈ શકશે કેનેડા, પાસપોર્ટ પરત મળશે: સુપ્રીમ કોર્ટે કહ્યું- "જાઓ, પૈસા કમાઓ અને દેવું ચૂકવો"

Rajpal Yadav Supreme Court Passport Release Canada Shoot: લાંબા સમયથી ચેક બાઉન્સ અને નાણાકીય વિવાદના કાનૂની મામલામાં ફસાયેલા જાણીતા બોલિવૂડ કલાકાર રાજપાલ યાદવને સુપ્રીમ કોર્ટ તરફથી ખૂબ જ મોટી રાહત મળી છે. સુપ્રીમ કોર્ટે રાજપાલ યાદવનો જપ્ત કરાયેલો પાસપોર્ટ પરત જારી કરવાનો સત્તાવાર આદેશ આપ્યો છે, જેથી તેઓ પોતાની ફિલ્મ શૂટિંગના સિલસિલામાં કેનેડા જઈ શકે અને કામ કરીને ઉધાર લીધેલી રકમ ચૂકવી શકે. સુનાવણી દરમિયાન CJI રાજપાલ યાદવને ટાંકતા કહ્યું હતું કે, "જાઓ, પૈસા કમાઓ અને તમારું દેવું ચૂકવો."

નાણાકીય વિવાદ ઉકેલવા માટે મધ્યસ્થીની નિમણૂક કરાશે
સુપ્રીમ કોર્ટે રાજપાલ યાદવ અને તેમના ધિરાણકર્તાઓ વચ્ચેના કરોડો રૂપિયાના આ નાણાકીય વિવાદને શાંતિપૂર્વક ઉકેલવા માટે એક વિશેષ મધ્યસ્થ નિમણૂક કરવાનો પણ નિર્ણય લીધો છે. નિશ્ચિતપણે આ નિર્ણય રાજપાલ યાદવ માટે ખુશીના સમાચાર લઈને આવ્યો છે, કારણ કે તેમના વિદેશ પ્રવાસમાં નડતી તમામ કાનૂની અડચણો હવે દૂર થઈ ગઈ છે. મુખ્ય ન્યાયાધીશની આ ટિપ્પણીથી સ્પષ્ટ થાય છે કે, કોર્ટ ઈચ્છે છે કે કલાકાર કામ ચાલુ રાખે જેથી કરજદારોના પૈસા પરત મળી શકે.

સુનાવણી દરમિયાન કોર્ટમાં ભાવુક થઈ ગયા હતા રાજપાલ યાદવ
આ અગાઉ 7 ઓક્ટોબરે હાથ ધરાયેલી સુનાવણી વખતે રાજપાલ યાદવ રૂબરૂ કોર્ટમાં હાજર રહ્યા હતા. તે સમયે મુખ્ય ન્યાયાધીશે તેમને કેટલીક સારી ફિલ્મો બનાવીને લોકોનું મનોરંજન કરવાની સલાહ આપી હતી. તે દરમિયાન જજ સમક્ષ પોતાની આપવીતી રજૂ કરતા રાજપાલ યાદવ અત્યંત ભાવુક થઈ ગયા હતા. તેમણે દુઃખ વ્યક્ત કરતા કહ્યું હતું કે, "લોકોનું મનોરંજન કરતા કરતા હું પોતે જ એક ડ્રામા બની ગયો છું. મારી ફિલ્મમાં મને ₹17 કરોડનું નુકસાન થયું હતું અને આ લોકોએ છેલ્લા 13 વર્ષથી મારી ફિલ્મ બનવા દીધી નથી."

બદલાની ભાવનાથી જીવન બરબાદ કરવાનો લગાવ્યો હતો આરોપ
રાજપાલ યાદવે કોર્ટમાં વધુમાં જણાવ્યું હતું કે, "સામે પક્ષે બદલાની ભાવનાથી પોતાના ₹5 કરોડના ચક્કરમાં મારું ₹22 કરોડનું નુકસાન કરાવી દીધું. શરૂઆતમાં મને એવું કહેવામાં આવ્યું હતું કે હું 100 કરોડનો માણસ છું પણ પછી અદાલતોમાં ઢસડવાની ધમકી આપવામાં આવી. મેં 200થી વધુ ફિલ્મોમાં કામ કરીને દેશના લોકોનું મનોરંજન કર્યું છે, પરંતુ આ કેસે મારું જીવન બરબાદ કરી નાખ્યું. હવે મને ફરીથી કામ મળવાનું શરૂ થયું છે અને હું દરેકનું દેવું ચૂકવી દઈશ."

શું હતો પૈસાનો વિવાદ?
રાજપાલ યાદવે વર્ષ 2012માં પોતાની ફિલ્મ 'અતા પતા લાપતા' ના નિર્માણ માટે મુરલી પ્રોજેક્ટ્સ પ્રાઇવેટ લિમિટેડ પાસેથી અંદાજે ₹5 કરોડની લોન લીધી હતી. આ ફિલ્મ બોક્સ ઓફિસ પર નિષ્ફળ સાબિત થઈ હતી, જેના કારણે નાણાકીય લેવડ-દેવડનો મામલો અદાલત સુધી પહોંચ્યો હતો. ચેક બાઉન્સ કેસમાં રાજપાલ યાદવને જેલની હવાનો સામનો પણ કરવો પડ્યો હતો. હાલમાં ₹2 કરોડ જમા કરાવ્યા બાદ કોર્ટે મધ્યસ્થતા અને પાસપોર્ટ રિલીઝ કરવાનો આદેશ આપીને મોટી રાહત પૂરી પાડી છે.