હોલીવૂડ ડાયરેક્ટર્સ પણ બોલશે 'જય શ્રી રામ'! લોસ એન્જલસમાં યોજાશે 'રામાયણ'નું સૌથી ભવ્ય પ્રીમિયર

Hollywood Set for Massive World Premiere of Epic Ramayana: રણબીર કપૂર અને સાઈ પલ્લવીની બહુપ્રતિક્ષિત ફિલ્મ 'રામાયણ' હવે વૈશ્વિક સ્તરે મોટો ધમાકો કરવા માટે સજ્જ થઈ રહી છે. આ મહાકાવ્ય આધારિત ફિલ્મનું ઈન્ટરનેશનલ પ્રમોશન 15 ઓક્ટોબરથી શરૂ થઈ ચૂક્યું છે, પરંતુ તેનું સૌથી મોટું આકર્ષણ 27 ઓક્ટોબરે જોવા મળશે. લોસ એન્જલસમાં આવેલા વિશ્વપ્રસિદ્ધ 'એકેડેમી મ્યુઝિયમ ઓફ મોશન પિક્ચર્સ' ખાતે ફિલ્મનું એક ભવ્ય વર્લ્ડ પ્રીમિયર યોજાવા જઈ રહ્યું છે. ફિલ્મ ઈન્ડસ્ટ્રીના ઈતિહાસમાં આ એક એવો પ્રસંગ બની રહેશે જ્યાં ભારતીય કલા અને સંસ્કૃતિનો ડંકો હોલિવૂડના સ્ટેજ પર વાગશે.

ભારતીય પરિધાનમાં સજ્જ થઈને રેડ કાર્પેટ પર ચાલશે હોલિવૂડના દિગ્ગજો
અકેડમી મ્યુઝિયમના આલીશાન 'ડેવિડ ગેફેન થિયેટર' ખાતે આ પ્રીમિયરનું 3D સ્ક્રીનિંગ યોજાશે, જેમાં લગભગ 945 વીઆઈપી મહેમાનો હાજરી આપશે. આ ઈવેન્ટની સૌથી ખાસ વાત એ છે કે નિર્માતાઓએ તેની થીમ ભારતીય તહેવાર 'દિવાળી' પર રાખી છે. આ સિવાય હોલિવૂડમાંથી આવતા આમંત્રિતો માટે ખાસ ભારતીય ટ્રેડિશનલ ડ્રેસ કોડ નક્કી કરવામાં આવ્યો છે. રામાયણની આખી સ્ટાર કાસ્ટ અને ક્રૂ મેમ્બર્સ પણ આ ઐતિહાસિક ક્ષણના સાક્ષી બનવા લોસ એન્જલસ પહોંચશે.

ક્રિસ્ટોફર નોલાન અને રુસો બ્રધર્સ સહિતના હોલિવૂડ દિગ્ગજોને મોકલાયા નિમંત્રણ
જોકે મેકર્સ તરફથી હજુ ગેસ્ટ લિસ્ટનું ઓફિશિયલ કન્ફર્મેશન બાકી છે, પરંતુ ઈન્ડસ્ટ્રીની ચર્ચાઓ મુજબ આ પ્રીમિયરમાં હોલિવૂડની દિગ્ગજ હસ્તીઓ ભાગ લઈ શકે છે. 'અવતાર'ના ડિરેક્ટર જેમ્સ કેમરૂન, 'ઈન્ટરસ્ટેલર'ના ક્રિસ્ટોફર નોલાન, 'ડ્યુન'ના ડેની વિલનવ અને 'એવેન્જર્સ: એન્ડગેમ'ના ફેમસ રૂસો બ્રધર્સ આ ભવ્ય સ્ક્રીનિંગમાં હાજર રહે તેવી પ્રબળ શક્યતા છે. આ ઉપરાંત માર્વલ ફિલ્મ્સના ચર્ચિત એક્ટર રાયન રેનોલ્ડ્સ પણ આ લિસ્ટમાં સામેલ છે.

20 ઓક્ટોબરથી ભારતમાં એડવાન્સ બુકિંગનો પ્રારંભ
આ ફિલ્મ અમેરિકન અને ગ્લોબલ માર્કેટમાં હિન્દી તેમજ ઈંગ્લિશ એમ બંને ભાષાઓમાં રિલીઝ થવાની છે. હિન્દી વર્ઝનનો રનટાઈમ 3 કલાક અને 15 મિનિટ રાખવામાં આવ્યો છે, જ્યારે વિદેશી દર્શકો માટે ઈંગ્લિશ વર્ઝન 2 કલાક અને 45 મિનિટનું રહેશે. ભારતીય દર્શકો માટે એડવાન્સ બુકિંગ 20 ઓક્ટોબરથી શરૂ થઈ રહ્યું છે. આ જ ખાસ દિવસે ફિલ્મનું નવું ગીત 'રામા-રામા' પણ રિલીઝ કરવામાં આવશે.

5 નવેમ્બરે સિનેમાઘરોમાં રિલીઝ થશે ભારતીય સિનેમાનો આ મહાકાવ્ય અવતાર
નિતેશ તિવારીના નિર્દેશનમાં બની રહેલી આ મહાકાવ્ય ફિલ્મ 'રામાયણ'નો પહેલો ભાગ 05 નવેમ્બરે વિશ્વભરના મોટા પડદા પર રિલીઝ થવા માટે સંપૂર્ણ રીતે તૈયાર છે. વિશ્વસ્તરીય વિઝ્યુઅલ ઈફેક્ટ્સ (VFX) અને ભારતીય પૌરાણિક કથાના સંમિશ્રણથી બનેલી આ ફિલ્મ ભારતીય સિનેમાના ઈતિહાસમાં એક નવો માઈલસ્ટોન સાબિત થશે તેવી પૂરેપૂરી આશા વ્યક્ત કરવામાં આવી રહી છે.