Ranveer Singh Pralay Azad Maidan Mumbai shooting: બોલિવૂડ એક્ટર રણવીર સિંહની આગામી ફિલ્મ ‘પ્રલય’ રિલીઝ પહેલા જ મોટા વિવાદમાં સપડાઈ છે. મુંબઈના ઐતિહાસિક આઝાદ મેદાનમાં આ ફિલ્મની શૂટિંગ માટે સરકારી પરવાનગી મળવાથી મુંબઈ ક્રિકેટ એસોસિએશન નારાજ થયું છે. શૂટિંગના જંગી સેટને કારણે મેદાન પર રમાનારી અંડર-14 અને અંડર-16 ઇન્ટરસ્કૂલ ક્રિકેટ ટુર્નામેન્ટની મેચો ટાળવી પડી છે. MCA એ આ નિર્ણય સામે સખત વાંધો ઉઠાવતા રમતગમતના મેદાનના વ્યાવસાયિક ઉપયોગનો આકરો વિરોધ કર્યો છે.
આઝાદ મેદાનના ઈતિહાસમાં પ્રથમ વખત ફિલ્મનું શૂટિંગ
મુંબઈનું આઝાદ મેદાન વર્ષોથી ક્રિકેટ અને ખેલાડીઓનું મુખ્ય કેન્દ્ર રહ્યું છે. સચિન તેંડુલકરથી લઈને ઘણા દિગ્ગજોએ આ જ મેદાન પરથી પોતાની કારકિર્દીની શરૂઆત કરી છે. મુંબઈ મિરરના અહેવાલ મુજબ, મહારાષ્ટ્ર સરકારના રમતગમત વિભાગે રણવીર સિંહની ફિલ્મ 'પ્રલય' ના મેકર્સને આઝાદ મેદાનમાં છ કલાક શૂટિંગ કરવાની ઐતિહાસિક મંજૂરી આપી હતી. એવું માનવામાં આવે છે કે આ મેદાન પર પહેલીવાર કોઈ ફિલ્મ શૂટિંગ માટે આ પ્રકારની સત્તાવાર પરવાનગી આપવામાં આવી છે, જેનાથી મેદાનની રોજિંદી ક્રિકેટ પ્રવૃત્તિઓ ખોરવાઈ ગઈ હતી.
મેદાનમાં ઉભા કરાયા મોટા સેટ અને બિછાવાઈ આર્ટિફિશિયલ ઘાસ
ફિલ્મના શૂટિંગ માટે મેકર્સ દ્વારા આઝાદ મેદાનમાં મોટા-મોટા સેટ તૈયાર કરવામાં આવ્યા હતા. એટલું જ નહીં, શૂટિંગની જરૂરિયાત મુજબ મેદાન પર આર્ટિફિશિયલ ઘાસ પણ પાથરવામાં આવ્યું હતું. મેદાન પર ચાલી રહેલી આ ભારેખમ તૈયારીઓના કારણે ક્રિકેટ મેચોના આયોજનમાં સીધી દખલગીરી થઈ હતી. MCAનું સ્પષ્ટ કહેવું છે કે, આ મેદાન યુવા ખેલાડીઓને ક્રિકેટની તાલીમ આપવા અને સ્પર્ધાઓ યોજવા માટે છે, નહીં કે કોમર્શિયલ ફિલ્મોના શૂટિંગ માટે.
માત્ર 40 હજાર રૂપિયા ભાડું લઈને રમતગમત વિભાગે આપી મંજૂરી
અહેવાલો અનુસાર, મહારાષ્ટ્રના રમતગમત વિભાગે ફિલ્મની પ્રોડક્શન કંપની 'લાઇટ રેઝ'ને આઝાદ મેદાનની 5 હજાર ચોરસ વાર સરકારી જમીન પર શૂટિંગની મંજૂરી આપી હતી. આ માટે મેકર્સ પાસેથી છ કલાક માટે માત્ર 40 હજાર રૂપિયા ભાડું વસૂલવામાં આવ્યું હતું અને 40 હજાર રિફંડેબલ ડિપોઝિટ લેવાઈ હતી. જોકે, શરત એ હતી કે ક્રિકેટ પિચ પર કોઈ વાહનો લઈ જવાશે નહીં કે જમીનમાં ખોદકામ કરાશે નહીં. પરંતુ, MCA એ આક્ષેપ કર્યો છે કે શૂટિંગના કારણે ટૂર્નામેન્ટ ખોરવાઈ છે અને રમતગમત વિભાગે મેદાનની મૂળ ઓળખ ભૂંસી નાખી છે.
MCA સભ્ય નદીમ મેમણના રમતગમત વિભાગ પર આકરા પ્રહાર
MCAની એપેક્સ કાઉન્સિલના સભ્ય નદીમ મેમણે આ મામલે સરકારની ભૂમિકા પર ગંભીર સવાલો ઉઠાવ્યા છે. તેમણે કહ્યું કે, "આ કોઈ શૂટિંગ સ્ટુડિયો નથી, પરંતુ ક્રિકેટનું પવિત્ર મેદાન છે જ્યાંથી આંતરરાષ્ટ્રીય ખેલાડીઓ તૈયાર થાય છે. રમતગમત વિભાગનું કામ રમતને પ્રોત્સાહન આપવાનું છે, નહીં કે મેદાનોને ભાડે આપીને ખેલાડીઓનું નુકસાન કરવાનું." તેમણે એ પણ સવાલ કર્યો કે શૂટિંગના કારણે રદ્દ થયેલી મેચોના નુકસાનની ભરપાઈ કોણ કરશે? MCA એ આ અંગે ડેપ્યુટી ડિરેક્ટર ઓફ સ્પોર્ટ્સને સત્તાવાર પત્ર લખીને જવાબદેહી માંગી છે.
રણવીર સિંહની ફિલ્મ 'પ્રલય'ની કહાની શું છે?
'પ્રલય' એ રણવીર સિંહની આગામી પોસ્ટ-એપોકેલિપ્ટિક સર્વાઈવલ થ્રિલર ફિલ્મ છે. આ ફિલ્મનું નિર્દેશન પ્રખ્યાત ફિલ્મમેકર હંસલ મહેતાના પુત્ર જય મહેતા કરી રહ્યા છે. આ ફિલ્મની વાર્તા એક એવી કાલ્પનિક દુનિયા પર આધારિત છે જ્યાં પ્રલય આવ્યા બાદ માણસો સામે માત્ર જીવતા રહેવાનો મોટો પડકાર ઊભો થાય છે. આ ફિલ્મમાં મનુષ્યના અસ્તિત્વ માટેના સંઘર્ષની કથા દર્શાવવામાં આવશે. ફિલ્મમાં રણવીર સિંહ સાથે મલયાલમ અભિનેત્રી કલ્યાણી પ્રિયદર્શન લીડ રોલમાં જોવા મળશે. આ ફિલ્મને મુંબઈના વાસ્તવિક લોકેશન્સ પર શૂટ કરવામાં આવી રહી છે, પરંતુ હવે આઝાદ મેદાન વિવાદને કારણે મેકર્સને શૂટિંગ લોકેશન બદલવાની ફરજ પડી શકે છે.
