કાવ્યા મારન અને અનિરુદ્ધનું ચેન્નાઈમાં યોજાશે ભવ્ય રિસેપ્શન: પીએમ મોદી સહિત દેશના દિગ્ગજ નેતાઓને પાઠવાયું નિમંત્રણ

Kavya Maran and Anirudh to Wed in Greece:તમિલ સિનેમાના મનોરંજન ક્ષેત્રે પોતાની આગવી ઓળખ બનાવનાર યુવા અને લોકપ્રિય સંગીતકાર અનિરુદ્ધ રવિચંદર અને આઈપીએલ ફ્રેન્ચાઇઝી 'સનરાઇઝર્સ હૈદરાબાદ' (SRH)ના માલિક કાવ્યા મારન ટૂંક સમયમાં જ લગ્નના પવિત્ર બંધનમાં બંધાવા જઈ રહ્યા છે. સોશિયલ મીડિયા અને મીડિયા રિપોર્ટ્સમાં ચાલી રહેલી ચર્ચાઓ અનુસાર, આ હાઈ-પ્રોફાઈલ દંપતી આગામી 11 નવેમ્બરે ગ્રીસના મનોરમ્ય સ્થળે લગ્ન કરશે. ગ્રીસમાં યોજાનારા આ શુભ પ્રસંગને અત્યંત ખાનગી રાખવામાં આવ્યો છે, જેમાં માત્ર બંને પરિવારના સભ્યો અને નજીકના મિત્રો જ હાજરી આપશે.

ચેન્નાઈમાં યોજાશે ભવ્ય અને શાહી રિસેપ્શન
ગ્રીસમાં સગાસંબંધીઓની હાજરીમાં સાત ફેરા લીધા બાદ, આ જોડી ભારત પરત ફરીને એક ભવ્ય ઉત્સવની ઉજવણી કરશે. આગામી 21 નવેમ્બરે તમિલનાડુની રાજધાની ચેન્નાઈ ખાતે એક શાહી અને આલીશાન વેડિંગ રિસેપ્શનનું આયોજન કરવામાં આવ્યું છે. આ કાર્યક્રમમાં દેશ-વિદેશની ગણમાન્ય હસ્તીઓ, રાજકારણીઓ, ક્રિકેટ જગતના સભ્યો અને ફિલ્મ ઈન્ડસ્ટ્રીના દિગ્ગજો હાજરી આપીને નવદંપતીને શુભાશિષ આપશે.

વડાપ્રધાન મોદી સહિત દેશના દિગ્ગજ નેતાઓને નિમંત્રણ
આ હાઈ-પ્રોફાઈલ લગ્ન માટે બંને પરિવાર દ્વારા ખાસ તૈયારીઓ કરવામાં આવી છે. 'સન ગ્રુપ'ના ચેરમેન અને કાવ્યાના પિતા કલાનિધિ મારન તેમજ અનિરુદ્ધના માતાપિતાએ નવી દિલ્હી પહોંચીને દેશના વડાપ્રધાન નરેન્દ્ર મોદી સાથે મુલાકાત કરી હતી અને તેમને લગ્નનું વિશેષ નિમંત્રણ પાઠવ્યું હતું. આ ઉપરાંત, તેમણે સોનિયા ગાંધી, પ્રિયંકા ગાંધી અને કેન્દ્રીય નાણાં મંત્રી નિર્મલા સીતારમણને પણ રૂબરૂ મળીને કાર્ડ આપ્યું હતું. એટલું જ નહીં, તેલંગાણાના મુખ્યમંત્રી રેવંત રેડ્ડી અને તમિલનાડુના મુખ્યમંત્રી સી. જોસેફ વિજયને પણ આ ચેન્નાઈ રિસેપ્શન માટે ખાસ આમંત્રિત કરવામાં આવ્યા છે.

જ્વેલરી બોક્સ જેવું રોયલ વેડિંગ કાર્ડ બન્યું આકર્ષણનું કેન્દ્ર
આ લગ્નની ભવ્યતાની સાથે સાથે તેનું નિમંત્રણ પત્રિકા એટલે કે વેડિંગ કાર્ડ પણ ભારે ચર્ચામાં છે. સોશિયલ મીડિયા પર વાયરલ થયેલું આ રોયલ વેડિંગ કાર્ડ "પિંક વ્હિસલ મેન" ના રજની આયંગર દ્વારા ખાસ ડિઝાઇન કરવામાં આવ્યું છે. એક સુંદર જ્વેલરી બોક્સ જેવી દેખાતી આ પત્રિકા સફેદ કલરના બોક્સ પર રોયલ બ્લુ પ્લાસ્ટર ઓફ પેરિસના ઝીણા કોતરકામથી તૈયાર કરાઈ છે. ડિઝાઇનિર્સ દ્વારા આ કંકોતરીની ઝલક ઇન્સ્ટાગ્રામ પર શેર કરવામાં આવી છે, જેને જોઈને ફેન્સ તેમની આ શાહી શૈલીના ખૂબ જ વખાણ કરી રહ્યા છે.

ક્રિકેટ અને મનોરંજન જગતનું અનોખું મિલન
કાવ્યા મારન આઈપીએલ ઓક્શન અને મેચ દરમિયાન પોતાની અલગ શૈલી માટે જાણીતા છે, જ્યારે અનિરુદ્ધ રવિચંદરે પોતાના સુપરહિટ સંગીતથી સાઉથ અને બોલિવૂડ બંને ઈન્ડસ્ટ્રીમાં ધૂમ મચાવી છે. આ બંને જાણીતી હસ્તીઓના લગ્નને કારણે ક્રિકેટ પ્રેમીઓ અને સિનેમા ચાહકોમાં પણ ભારે ઉત્સાહ જોવા મળી રહ્યો છે. ફેન્સ સોશિયલ મીડિયાના માધ્યમથી આ જોડીને સતત અભિનંદન અને ભવિષ્ય માટે શુભેચ્છાઓ પાઠવી રહ્યા છે.