Florida Jet Crash: અમેરિકાના ફ્લોરિડામાં રવિવારે એક બિઝનેસ જેટ વિમાન ભયાનક દુર્ઘટનાનો ભોગ બન્યું હતું. પામ બીચ કાઉન્ટીમાં એક વ્યસ્ત માર્ગ નજીક 9 લોકોને લઈ જઈ રહેલું વિમાન તૂટી પડ્યું અને આગની જ્વાળાઓમાં લપેટાઈ ગયું હતું. આ દુર્ઘટનામાં 9 લોકોએ જીવ ગુમાવ્યા છે. ઘટનાસ્થળેથી પસાર થઈ રહેલા વાહનચાલકોએ પ્લેન ક્રેશનો ભયાનક વીડિયો પોતાના કેમેરામાં કેદ કર્યો હતો. આ સ્થળ અમેરિકાના રાષ્ટ્રપતિ ડોનાલ્ડ ટ્રમ્પના નિવાસસ્થાનથી આશરે 14 કિલોમીટર દૂર હોવાનું જણાવવામાં આવ્યું છે.
પાયલટના અંતિમ શબ્દો: 'હે ભગવાન, અમારી પાસે સમય નથી!'
વિમાન દુર્ઘટના પહેલાં પાયલટ અને એર ટ્રાફિક કંટ્રોલ વચ્ચે થયેલી વાતચીતની વિગતો સામે આવી છે. પાયલટે ઇમરજન્સી સંદેશ આપતાં કહ્યું હતું કે વિમાન ઓવરસ્પીડની સ્થિતિમાં છે અને તે પ્રતિ મિનિટ આશરે 20 હજાર ફૂટની ઝડપે નીચે જઈ રહ્યું છે. પાયલટે વિમાન જમીન સાથે ટકરાવાની આશંકા વ્યક્ત કરતાં કહ્યું હતું, 'Mayday, Mayday... અમે જમીન સાથે ટકરાવા જઈ રહ્યા છીએ. હે ભગવાન, અમારી પાસે સમય નથી.' આ સંદેશ બાદ વિમાન ક્રેશ થયું હતું.
શરૂઆતમાં પાયલટે હવામાન સામાન્ય હોવાનું જણાવ્યું હતું
દુર્ઘટના પહેલાં પાયલટે એર ટ્રાફિક કંટ્રોલર્સને જણાવ્યું હતું કે વિમાન પર સામાન્ય પ્રમાણમાં બરફ જામી રહ્યો છે અને આવી સ્થિતિમાં વિમાનને નિયંત્રિત કરી શકાય છે. તે સમયે થોડા પ્રમાણમાં ટર્બ્યુલન્સ પણ અનુભવાઈ રહી હતી. જોકે, ત્યારબાદ હવામાન વધુ ખરાબ બન્યું હતું અને વિમાન પર બરફ જમવાની સ્થિતિ વધી હતી. આ પરિસ્થિતિને ધ્યાનમાં રાખીને પાયલટે 2,000 ફૂટની ઊંચાઈએ જવાની મંજૂરી માગી હતી.
પામ બીચ કાઉન્ટીમાં સર્જાઈ દુર્ઘટના
આ દુર્ઘટના ફ્લોરિડાના પામ બીચ કાઉન્ટીમાં ક્રેસ્ટહેવન નજીક સર્જાઈ હતી. આ વિસ્તાર અમેરિકાના રાષ્ટ્રપતિ ડોનાલ્ડ ટ્રમ્પના નિવાસસ્થાનથી આશરે સાત માઈલ એટલે કે 14 કિલોમીટર દૂર હોવાનું જણાવાયું છે. વિમાન એક વ્યસ્ત માર્ગ નજીક તૂટી પડતાં તેમાં આગ લાગી ગઈ હતી. ઘટનાસ્થળેથી પસાર થઈ રહેલા વાહનચાલકોએ આ ભયાનક દૃશ્યો રેકોર્ડ કર્યા હતા. પ્લેન ક્રેશનો વીડિયો સામે આવ્યા બાદ ઘટના ચર્ચામાં આવી છે.
હવામાન અને વિમાનની સ્થિતિ અંગે તપાસ મહત્ત્વપૂર્ણ
વિમાન પર બરફ જમવો, ખરાબ હવામાન અને ટર્બ્યુલન્સ જેવી સ્થિતિઓ દુર્ઘટના પહેલાં સામે આવી હતી. જોકે, આ તમામ પરિબળો વચ્ચે વિમાન કાબૂ બહાર જવાનું ચોક્કસ કારણ શું હતું તે તપાસ બાદ જ સ્પષ્ટ થઈ શકશે. દુર્ઘટનાની સંપૂર્ણ વિગતો અને તપાસના તારણો પર હવે નજર રહેશે.
