UAE Honours Captain Smit Machchar: ગુજરાતી મૂળના પાયલોટ કેપ્ટન સ્મિત મચ્છરને અસાધારણ સાહસ અને 174 મુસાફરોના જીવ બચાવવા બદલ સંયુક્ત આરબ અમીરાત (UAE) દ્વારા પ્રતિષ્ઠિત ‘ઓર્ડર ઓફ ઝાયેદ II’ સન્માનથી નવાજવામાં આવ્યા છે. UAEના રાષ્ટ્રપતિ શેખ મોહમ્મદ બિન જાયેદ અલ નાહ્યાને કેપ્ટન સ્મિત મચ્છર અને તેમના ક્રૂ સભ્યોની બહાદુરી, સૂઝબૂઝ અને ફરજ પ્રત્યેની નિષ્ઠાની પ્રશંસા કરી હતી. આ સન્માન દુબઈથી ઇઝરાયલ જઈ રહેલી ફ્લાયદુબઈની ફ્લાઇટમાં સર્જાયેલી ગંભીર પરિસ્થિતિ દરમિયાન તેમણે દાખવેલી હિંમતને બિરદાવવા માટે આપવામાં આવ્યું છે.
રાષ્ટ્રપતિએ કેપ્ટન સ્મિત મચ્છર સહિત ક્રૂનું સન્માન કર્યું
UAEના રાષ્ટ્રપતિ શેખ મોહમ્મદ બિન જાયેદ અલ નાહ્યાને કેપ્ટન સ્મિત મચ્છર અને તેમના સાથી ક્રૂ સભ્યોને પ્રથમ શ્રેણીના ‘ઓર્ડર ઓફ ઝાયેદ II’ સન્માનથી નવાજ્યા છે. દુબઈના ક્રાઉન પ્રિન્સ શેખ હમદાન બિન મોહમ્મદ બિન રશીદ અલ મક્તૂમે ક્રૂ સભ્યોને આ સન્માન અર્પણ કર્યું હતું. આ પ્રસંગે રાષ્ટ્રપતિએ ક્રૂ સભ્યો સાથે મુલાકાત કરી તેમની હિંમત અને સમયસૂચકતાની પ્રશંસા કરી હતી. મુશ્કેલ પરિસ્થિતિમાં પણ શાંતિ જાળવીને મુસાફરોની સુરક્ષાને પ્રાથમિકતા આપવા બદલ તેમની કામગીરીને બિરદાવવામાં આવી હતી.
ફ્લાયદુબઈની ફ્લાઇટમાં સર્જાયું હતું મોટું સંકટ
આ ઘટના 30 સપ્ટેમ્બરના રોજ ફ્લાયદુબઈની ફ્લાઇટ FZ1073માં બની હતી. દુબઈથી ઇઝરાયલના તેલ અવીવ જઈ રહેલા આ વિમાનમાં ઉડાન દરમિયાન કોકપીટમાં ગંભીર સંઘર્ષ સર્જાયો હતો. કો-પાયલોટે કેપ્ટન સ્મિત મચ્છર પર હુમલો કરીને વિમાનનો કાબૂ મેળવવાનો પ્રયાસ કર્યો હતો. તપાસમાં સામે આવેલી વિગતો અનુસાર, આરોપી વિમાનને ઇઝરાયલના બેન ગુરિયન એરપોર્ટ પર ક્રેશ કરવા માગતો હતો. જો સમયસર પરિસ્થિતિ પર કાબૂ મેળવવામાં ન આવ્યો હોત તો મોટી દુર્ઘટના સર્જાઈ શકી હોત.
ગંભીર ઈજા છતાં કેપ્ટન સ્મિત મચ્છરે હિંમત ન હારી
હુમલામાં ગંભીર રીતે ઘાયલ થવા છતાં કેપ્ટન સ્મિત મચ્છરે હિંમત ગુમાવી નહોતી. ભારે સંઘર્ષ બાદ તેમણે કોકપીટનો દરવાજો ખોલવામાં સફળતા મેળવી હતી. ત્યારબાદ અન્ય ક્રૂ સભ્યો અને જાગૃત મુસાફરોએ સાથે મળીને હુમલાખોરને કાબૂમાં લીધો હતો. પરિસ્થિતિની ગંભીરતાને ધ્યાનમાં રાખીને વિમાનનો રૂટ બદલીને સાઉદી અરેબિયાના તબુક એરપોર્ટ પર સુરક્ષિત રીતે લેન્ડિંગ કરવામાં આવ્યું હતું. આ નિર્ણય અને ક્રૂની સમયસૂચકતાને કારણે વિમાનમાં સવાર 174 મુસાફરો સહિત તમામ લોકોની સુરક્ષા જાળવવામાં સફળતા મળી હતી.
‘ઓર્ડર ઓફ ઝાયેદ II’થી બહાદુરીને સન્માન
UAE દ્વારા આપવામાં આવેલું ‘ઓર્ડર ઓફ ઝાયેદ’ દેશના સ્થાપક શેખ ઝાયેદ બિન સુલતાન અલ નાહ્યાનના નામ સાથે જોડાયેલું પ્રતિષ્ઠિત સન્માન છે. કેપ્ટન સ્મિત મચ્છર અને તેમના ક્રૂ સભ્યોને આ સન્માન આપીને UAEએ સંકટની ઘડીમાં તેમની ફરજ પ્રત્યેની નિષ્ઠા અને અસાધારણ સાહસને બિરદાવ્યું છે. ગુજરાતી મૂળના કેપ્ટન સ્મિત મચ્છરની આ સિદ્ધિએ વિમાનના મુસાફરોની સુરક્ષા માટે પાયલોટની જવાબદારી, હિંમત અને તાત્કાલિક નિર્ણય લેવાની ક્ષમતાનું મહત્ત્વ ફરી ઉજાગર કર્યું છે.
