ટૉપ ન્યૂઝ

મણિપુરમાં ઝેરી દારૂનો કાળો કહેર! 18 લોકોના મોત, 181 દર્દીઓ હોસ્પિટલમાં દાખલ; CMએ આપ્યા તપાસના આદેશ

21 નવેમ્બર, 2026•
GVGujaratvandan team
મણિપુરમાં ઝેરી દારૂનો કાળો કહેર! 18 લોકોના મોત, 181 દર્દીઓ હોસ્પિટલમાં દાખલ; CMએ આપ્યા તપાસના આદેશ

Manipur Hooch Tragedy: પૂર્વોત્તર ભારતના મણિપુરના ચંદેલ જિલ્લામાં ઝેરી દારૂ પીવાથી મોટી દુર્ઘટના સર્જાઈ છે. છેલ્લા ત્રણ દિવસમાં કથિત રીતે ઝેરી દારૂ પીવાના કારણે અત્યાર સુધીમાં 18 લોકોનાં મોત થયાં છે, જ્યારે 181 લોકોને સારવાર માટે હોસ્પિટલમાં દાખલ કરવામાં આવ્યા છે. અસરગ્રસ્તોમાં અનેકની હાલત ગંભીર હોવાનું જાણવા મળ્યું છે. પ્રાથમિક તપાસમાં આ મેથેનોલ પોઈઝનિંગનો મામલો હોવાનું સામે આવ્યું છે.

શિજા હોસ્પિટલમાં દર્દીઓનો ધસારો, ઇમરજન્સી સેવાઓ પર દબાણ
ઘટના બાદ ઇમ્ફાલની શિજા હોસ્પિટલ એન્ડ રિસર્ચ ઇન્સ્ટિટ્યૂટમાં દર્દીઓનો ધસારો જોવા મળી રહ્યો છે. સતત નવા દર્દીઓ આવી રહ્યા હોવાથી હોસ્પિટલની ઇમરજન્સી મેડિકલ સેવાઓ પર ભારે દબાણ ઊભું થયું છે. શિજા હોસ્પિટલના જોઇન્ટ મેનેજિંગ ડિરેક્ટર ડૉ. ચેતન ખુંડોંગબામે જણાવ્યું હતું કે ચંદેલ જિલ્લામાં ઝેરી પદાર્થની અસરથી લોકો બીમાર પડ્યા હોવાની માહિતી અગાઉથી મળી હતી. દર્દીઓ હોસ્પિટલ પહોંચ્યા બાદ તપાસમાં મેથેનોલ પોઈઝનિંગનો મામલો હોવાનું જાણવા મળ્યું હતું. અત્યાર સુધીમાં હોસ્પિટલમાં 140થી વધુ દર્દીઓ પહોંચ્યા હતા, જેમાંથી એકને મૃત અવસ્થામાં લાવવામાં આવ્યો હતો. હાલમાં ત્રણ દર્દીઓની હાલત અત્યંત ગંભીર છે અને તેમની હિમોડાયાલિસિસ દ્વારા સારવાર ચાલી રહી છે. હોસ્પિટલના તમામ બેડ ભરાઈ જતાં રાજ્યના આરોગ્ય વિભાગ, RIMS અને JNIMS પાસેથી વધારાની મદદ માગવામાં આવી છે. લાઇફ સપોર્ટ અથવા હિમોડાયાલિસિસની જરૂરિયાત ધરાવતા ગંભીર દર્દીઓને શિજા હોસ્પિટલમાં જ રાખવામાં આવશે, જ્યારે અન્ય દર્દીઓને સારવાર માટે બીજા કેન્દ્રોમાં ખસેડવામાં આવી રહ્યા છે.

મુખ્યમંત્રી ખેમચંદ યુમનામે હોસ્પિટલની મુલાકાત લીધી
ઘટનાની ગંભીરતાને ધ્યાનમાં રાખીને મણિપુરના મુખ્યમંત્રી ખેમચંદ યુમનામે ઇમ્ફાલની શિજા હોસ્પિટલ અને સજીવા સ્થિત બબીના હોસ્પિટલની મુલાકાત લીધી હતી. તેમણે અસરગ્રસ્ત દર્દીઓ અને તબીબી ટીમો સાથે મુલાકાત કરીને સારવારની વ્યવસ્થા તથા પરિસ્થિતિની સમીક્ષા કરી હતી. મુખ્યમંત્રીએ સોશિયલ મીડિયા પ્લેટફોર્મ 'એક્સ' પર જણાવ્યું હતું કે તમામ દર્દીઓની તબીબોની દેખરેખ હેઠળ સારવાર ચાલી રહી છે. તેમણે બંને હોસ્પિટલના વહીવટી અધિકારીઓને દર્દીઓને શ્રેષ્ઠ તબીબી સુવિધા અને શક્ય તમામ મદદ પૂરી પાડવા સૂચના આપી હતી. આ ઉપરાંત ચંદેલ જિલ્લામાં સારવાર અને રાહત કામગીરી ઝડપી બનાવવા માટે જનરલ મેડિસિનના નિષ્ણાતના નેતૃત્વમાં જરૂરી દવાઓ સાથે ખાસ મેડિકલ ટીમ પણ રવાના કરવામાં આવી છે. મુખ્યમંત્રીએ દર્દીઓના ઝડપથી સ્વસ્થ થવાની પ્રાર્થના કરી હતી અને મૃતકોના પરિવારજનો પ્રત્યે સંવેદના વ્યક્ત કરી હતી.

કાકચિંગ જિલ્લાના સુગનૂમાંથી દારૂ ખરીદાયો હોવાની આશંકા
ચંદેલ જિલ્લાના પોલીસ અધિક્ષકના જણાવ્યા અનુસાર, મૃતકોએ જે શંકાસ્પદ દારૂ પીધો હતો તે કાકચિંગ જિલ્લાના સુગનૂ વિસ્તારમાંથી ખરીદવામાં આવ્યો હતો. તેમણે જણાવ્યું હતું કે ચંદેલ જિલ્લામાં સ્થાનિક સ્તરે દારૂ બનાવવામાં આવતો હોવાની કોઈ માહિતી પોલીસ પાસે નથી. પોલીસે સત્તાવાર નિવેદન જાહેર કરીને લોકોને આગામી સૂચના ન મળે ત્યાં સુધી સ્થાનિક સ્તરે બનાવવામાં આવતા દારૂનું સેવન નહીં કરવાની સલાહ આપી છે. બીજી તરફ, રાજ્ય સરકારે સમગ્ર ઘટનાની ઊંડાણપૂર્વક તપાસ કરાવવાની ખાતરી આપી છે. મુખ્યમંત્રીએ સ્પષ્ટ કર્યું છે કે આ દુર્ઘટના માટે જવાબદાર લોકો સામે કડકમાં કડક કાર્યવાહી કરવામાં આવશે.

મેથેનોલ ભળવાથી દુર્ઘટના સર્જાઈ હોવાની આશંકા
પ્રાથમિક તપાસ મુજબ સ્થાનિક દારૂમાં ઝેરી મેથેનોલ ભળી જવાને કારણે આ દુર્ઘટના સર્જાઈ હોવાની આશંકા છે. મેથેનોલ એક ઝેરી રસાયણ છે, જેનું સેવન શરીર માટે અત્યંત જોખમી બની શકે છે. આ ઘટનામાં અનેક લોકોની તબિયત લથડતાં તેમને અલગ-અલગ હોસ્પિટલમાં ખસેડવામાં આવ્યા છે. પોલીસ અને આરોગ્ય વિભાગ દ્વારા સમગ્ર મામલે તપાસ તથા સારવારની કામગીરી હાથ ધરવામાં આવી રહી છે.

Tags:
GujaratVandanManipur CMChandel District NewsMethanol PoisoningManipur Poisonous Liquor
અમારા WhatsApp ચેનલ સાથે જોડાઓ
તાજા અપડેટ્સ મેળવો સીધા તમારા WhatsApp પર
Join Now

Videos

હે ગોળમટોળ લાલરંગવાળા 14 કિલોના મારા પ્રિય સિલિન્ડર તું ક્યાં છે.?

હે ગોળમટોળ લાલરંગવાળા 14 કિલોના મારા પ્રિય સિલિન્ડર તું ક્યા...

16 માર્ચ, 2026
'56 ઇંચની છાતી' અને ટ્રમ્પનો આદેશ: વ્હાઇટ હાઉસથી કેમ ચાલે છે ભારતનો વહીવટ? જુઓ સનસનીખેજ વિશ્લેષણ.

'56 ઇંચની છાતી' અને ટ્રમ્પનો આદેશ: વ્હાઇટ હાઉસથી કેમ ચાલે છે...

10 માર્ચ, 2026
નીતિશ કુમારની 'એક્ઝિટ' અને પુત્ર નિશાંતની 'એન્ટ્રી'! ભાજપે બિહારમાં કેવી રીતે રમી ‘માસ્ટર ગેમ’?

નીતિશ કુમારની 'એક્ઝિટ' અને પુત્ર નિશાંતની 'એન્ટ્રી'! ભાજપે બ...

10 માર્ચ, 2026
'કેજરીવાલ તો ગિયો...'? નીચલી કોર્ટના ચુકાદા પર આટલી ગર્જના કેમ? જાણો અંદરની વાત!

'કેજરીવાલ તો ગિયો...'? નીચલી કોર્ટના ચુકાદા પર આટલી ગર્જના ક...

10 માર્ચ, 2026
શિક્ષણ મંત્રીનું રાજીનામું માંગતા CJI? ન્યાયતંત્રને બદનામ કરવાના કાવતરાનો પર્દાફાશ!

શિક્ષણ મંત્રીનું રાજીનામું માંગતા CJI? ન્યાયતંત્રને બદનામ કર...

10 માર્ચ, 2026
શું પાવરફુલ મોદીની કોઈ 'દુખતી નસ' ટ્રમ્પના હાથમાં છે?

શું પાવરફુલ મોદીની કોઈ 'દુખતી નસ' ટ્રમ્પના હાથમાં છે?

26 ફેબ્રુઆરી, 2026
 ભારતના રાજનેતાઓની રાજનીતિ પણ 3 વસ્તુઓથી ચાલે છે રેવડી કલ્ચર... રેવડી કલ્ચર... ઔર રેવડી કલ્ચર...

ભારતના રાજનેતાઓની રાજનીતિ પણ 3 વસ્તુઓથી ચાલે છે રેવડી કલ્ચર...

26 ફેબ્રુઆરી, 2026