Peshawar School Roof Collapse Death Toll 21: પડોશી દેશ પાકિસ્તાનના પેશાવર શહેરમાં ગુરુવારે એક અત્યંત હૃદયદ્રાવક અને મોટી દુર્ઘટના સામે આવી છે. પેશાવરના દિર કોલોની વિસ્તારમાં આવેલી એક ખાનગી સ્કૂલની જર્જરિત છત અચાનક ધરાશાયી થઈ જવાને કારણે 21 લોકોના કમકમાટીભર્યા મોત નીપજ્યા છે. મૃત્યુ પામનારાઓમાં 20 માસૂમ વિદ્યાર્થીઓ અને એક મહિલા શિક્ષિકા સામેલ છે. દુર્ઘટનાનો ભગ બનેલા તમામ બાળકોની ઉંમર 13 વર્ષ અથવા તેનાથી ઓછી હોવાનું જણાવવામાં આવ્યું છે.
લેડી રીડિંગ હોસ્પિટલમાં ઇમરજન્સી જાહેર, 40થી વધુ ઘાયલ
શરૂઆતના અહેવાલોમાં મૃત્યુઆંક ઓછો હોવાનું જણાવાયું હતું પરંતુ, લેડી રીડિંગ હોસ્પિટલના સત્તાવાર પ્રવક્તાએ પુષ્ટિ કરી છે કે હોસ્પિટલમાં અત્યાર સુધીમાં 17થી વધુ મૃતદેહો અને એક મહિલા શિક્ષિકાનો મૃતદેહ લાવવામાં આવ્યો છે. કેપિટલ જ્યોતિ પોલીસ અધિકારી ડો. મિયાં સઈદે માહિતી આપી છે કે આ દુર્ઘટનામાં 40થી વધુ વિદ્યાર્થીઓ ગંભીર રીતે ઘાયલ થયા છે. ઘાયલોની હાલત ગંભીર હોવાથી હોસ્પિટલ પ્રશાસન દ્વારા તાત્કાલિક ધોરણે ઇમરજન્સી જાહેર કરીને સારવાર શરૂ કરવામાં આવી છે. આ ઘટનાની જાણ થતા જ બચાવ અધિકારીઓ અને સ્થાનિક પ્રશાસનની ટીમ ઘટનાસ્થળે દોડી આવી હતી. સ્કૂલની છત ધરાશાયી થવાને કારણે મોટી સંખ્યામાં માસૂમ બાળકો કાટમાળ નીચે દબાઈ ગયા હતા. રાહત અને બચાવ કામગીરી સાથે જોડાયેલી ટીમો દ્વારા કાટમાળ હટાવીને ફસાયેલા બાળકો અને શાળાના અન્ય સ્ટાફની સઘન શોધખોળ કરવામાં આવી રહી છે.
વડાપ્રધાન શહેબાઝ શરીફ અને ગવર્નર સલાહકાર દ્વારા ઊંડા શોકની લાગણી વ્યક્ત
આ ગોઝારી ઘટના અંગે પાકિસ્તાનના વડાપ્રધાન શહેબાઝ શરીફે ઊંડો શોક વ્યક્ત કર્યો છે. તેમણે મૃતકોની આત્માની શાંતિ માટે પ્રાર્થના કરી છે અને ઘાયલોને ત્વરિત અને શ્રેષ્ઠ તબીબી સહાય પૂરી પાડવા સત્તાવાળાઓને સખત આદેશ આપ્યા છે. આ ઉપરાંત KPના ગવર્નરના સૂચના અને જનસંપર્ક સલાહકાર સમર હારૂન બિલોરે પણ દુર્ઘટના પર દુઃખ વ્યક્ત કરીને પીડિત પરિવારજનોને તમામ શક્ય સરકારી મદદની ખાતરી આપી છે.
જર્જરિત ઇમારતો અને શાળા સુરક્ષા પર ઉઠ્યા ગંભીર સવાલો
આ કરુણાંતિકા બાદ પાકિસ્તાનની શૈક્ષણિક સંસ્થાઓની સુરક્ષા, મકાનોની ગુણવત્તા અને બિલ્ડિંગ રેગ્યુલેશન સામે ફરીથી ગંભીર સવાલો ઊભા થયા છે. પ્રશાસનની બેદરકારીના કારણે અસંખ્ય માસૂમ બાળકોએ પોતાનો જીવ ગુમાવવો પડ્યો છે, જેને લઈને સ્થાનિક લોકોમાં ભારે રોષ જોવા મળી રહ્યો છે.
