US Midterm Election Results 2026: અમેરિકાના રાષ્ટ્રપતિ ડોનાલ્ડ ટ્રમ્પના બે વર્ષના કાર્યકાળ બાદ યોજાયેલી મિડટર્મ ચૂંટણીઓનાં પરિણામોએ અમેરિકાના રાજકારણમાં મોટો ઉલટફેર સર્જ્યો છે. ચૂંટણીના પ્રારંભિક પરિણામો અને ટ્રેન્ડ્સમાં ડેમોક્રેટિક પાર્ટીએ રિપબ્લિકન પાર્ટીના પરંપરાગત ગઢ ગણાતા વિસ્તારોમાં પણ જીત મેળવી છે. સેનેટ અને હાઉસ ઓફ રિપ્રેઝન્ટેટિવ્સ બંનેમાં ડેમોક્રેટ્સે મજબૂત પ્રદર્શન કર્યું છે. આ ચૂંટણીમાં ભારતીય મૂળના ઉમેદવારો માટે પણ ખુશીના સમાચાર છે. ફ્લોરિડાથી પિયા ડાંડિયા અને વર્જિનિયાથી સુહાસ સુબ્રમણ્યમ વિજયી બન્યાં છે.
સાઉથ કેરોલિનામાં રિપબ્લિકનને મોટો ઝટકો
અમેરિકાની મિડટર્મ ચૂંટણીમાં રિપબ્લિકન પાર્ટીને સાઉથ કેરોલિનામાં મોટો ઝટકો લાગ્યો છે. અહીં ડેમોક્રેટિક પાર્ટીના ઉમેદવાર એની એન્ડ્રુઝે સેનેટની બેઠક પર જીત મેળવી છે. આ બેઠક લાંબા સમયથી રિપબ્લિકન પાર્ટી સાથે જોડાયેલી રહી હતી. આ પરિણામને કારણે સાઉથ કેરોલિનામાં ડેમોક્રેટ્સને મહત્ત્વપૂર્ણ સફળતા મળી છે. ચૂંટણીના પરિણામોએ રિપબ્લિકન પક્ષના પરંપરાગત ગઢમાં પણ રાજકીય સમીકરણો બદલાઈ શકે છે તે દર્શાવ્યું છે.
જ્યોર્જિયા અને ફ્લોરિડામાં ઐતિહાસિક પરિણામો
અમેરિકાની ગવર્નર ચૂંટણીઓમાં પણ ઐતિહાસિક પરિણામો સામે આવ્યાં છે. જ્યોર્જિયામાં ડેમોક્રેટિક ઉમેદવાર કીશા લાન્સ બોટમ્સે જીત મેળવીને ઇતિહાસ રચ્યો છે. તેઓ અમેરિકાના ઇતિહાસમાં પ્રથમ અશ્વેત મહિલા ગવર્નર બન્યાં છે. બીજી તરફ, ફ્લોરિડામાં રિપબ્લિકન ઉમેદવાર બાયરન ડોનાલ્ડ્સે ગવર્નરની ચૂંટણી જીતી છે. આ જીત સાથે તેઓ ફ્લોરિડાના પ્રથમ અશ્વેત ગવર્નર બન્યા છે. બંને પરિણામો અમેરિકાના રાજકીય ઇતિહાસમાં મહત્ત્વપૂર્ણ ગણાઈ રહ્યાં છે.
સેનેટ અને હાઉસ બંનેમાં ડેમોક્રેટ્સનો દબદબો
મિડટર્મ ચૂંટણીનાં પરિણામોમાં ડેમોક્રેટિક પાર્ટીએ સેનેટ અને હાઉસ ઓફ રિપ્રેઝન્ટેટિવ્સ બંનેમાં મજબૂત પ્રદર્શન કર્યું છે.
સેનેટનું ચિત્ર: 100 બેઠકો ધરાવતી સેનેટમાં ડેમોક્રેટ્સે 45 બેઠકો જીતી છે અને 7 બેઠકો પર આગળ ચાલી રહ્યા છે. બીજી તરફ, રિપબ્લિકન પાર્ટીએ 35 બેઠકો જીતી છે અને 8 બેઠકો પર સરસાઈ મેળવી છે.
હાઉસ ઓફ રિપ્રેઝન્ટેટિવ્સ: 435 બેઠકો ધરાવતા હાઉસમાં ડેમોક્રેટ્સે 71 બેઠકો પર જીત મેળવી છે અને 116 બેઠકો પર આગળ છે. જ્યારે રિપબ્લિકન પાર્ટી 32 બેઠકો જીતી છે અને 86 બેઠકો પર આગળ ચાલી રહી છે.
આ આંકડાઓ મુજબ, બંને ગૃહોમાં ડેમોક્રેટ્સની સ્થિતિ મજબૂત બની રહી છે અને બહુમતી મેળવવાની તેમની આશા વધી છે.
કોલોરાડોમાં જોન હિકેનલૂપરની ફરી જીત
કોલોરાડોથી ડેમોક્રેટિક ઉમેદવાર જોન હિકેનલૂપરે સેનેટની ચૂંટણીમાં ફરી એકવાર વિજય મેળવ્યો છે. CNNના પ્રોજેક્શન અનુસાર, તેમણે રિપબ્લિકન ઉમેદવાર માર્ક બેસ્લીને હરાવીને પોતાની બેઠક જાળવી રાખી છે. જોન હિકેનલૂપર અગાઉ કોલોરાડોના ગવર્નર રહી ચૂક્યા છે. તેઓ રાજ્યના હાઉસ ઓફ રિપ્રેઝન્ટેટિવ્સમાં પણ સેવા આપી ચૂક્યા છે. આ જીત સાથે સેનેટમાં તેમનો સતત બીજો કાર્યકાળ શરૂ થશે.
વ્યોમિંગમાં રિપબ્લિકન એરિક બાર્લો ગવર્નર તરીકે વિજયી
વ્યોમિંગમાં રિપબ્લિકન ઉમેદવાર એરિક બાર્લોએ ગવર્નરની ચૂંટણીમાં જીત મેળવી છે. તેમણે ડેમોક્રેટિક પ્રતિસ્પર્ધી કેનેથ કેસનરને હરાવ્યા છે. એરિક બાર્લોને ટ્રમ્પની પસંદગીની વિરુદ્ધ ટિકિટ મળી હોવાનો ઉલ્લેખ પણ ચૂંટણીની ચર્ચામાં થઈ રહ્યો છે. તેઓ નિવૃત્ત થઈ રહેલા ગવર્નર માર્ક ગોર્ડનનું સ્થાન લેશે.
ભારતીય મૂળનાં પિયા ડાંડિયા અને સુહાસ સુબ્રમણ્યમની જીત
આ મિડટર્મ ચૂંટણીમાં ભારતીય મૂળના ઉમેદવારોની જીત પણ ચર્ચાનો વિષય બની છે. ફ્લોરિડાથી પિયા ડાંડિયા અને વર્જિનિયાથી સુહાસ સુબ્રમણ્યમે વિજય મેળવીને ભારતીય સમુદાયનું ધ્યાન ખેંચ્યું છે.
પિયા ડાંડિયા – ફ્લોરિડા: ડેમોક્રેટિક ઉમેદવાર પિયા ડાંડિયાએ ફ્લોરિડાની 22મી કોંગ્રેસનલ ડિસ્ટ્રિક્ટમાંથી જીત મેળવી છે. રિપબ્લિકન પ્રભુત્વ ધરાવતા ફ્લોરિડામાં તેમની જીતને ડેમોક્રેટિક પાર્ટી માટે મહત્ત્વપૂર્ણ સફળતા માનવામાં આવી રહી છે.
સુહાસ સુબ્રમણ્યમ – વર્જિનિયા: વર્જિનિયાના 10મા કોંગ્રેસનલ ડિસ્ટ્રિક્ટમાંથી 40 વર્ષીય સુહાસ સુબ્રમણ્યમે ફરી એકવાર જીત મેળવી છે. તેમણે 61.5 ટકા મત મેળવ્યા છે, જ્યારે તેમના રિપબ્લિકન પ્રતિસ્પર્ધી ડેવ બેકવિથને 36.4 ટકા મત મળ્યા છે. સુહાસ અગાઉ પૂર્વ રાષ્ટ્રપતિ બરાક ઓબામાના વરિષ્ઠ સલાહકાર તરીકે પણ કામ કરી ચૂક્યા છે.
નોર્થ કેરોલિના અને ન્યૂ હેમ્પશાયરમાં ડેમોક્રેટ્સની જીત
નોર્થ કેરોલિનાની સેનેટ ચૂંટણીમાં પૂર્વ ગવર્નર અને ડેમોક્રેટિક ઉમેદવાર રોય કૂપરે રિપબ્લિકન ઉમેદવાર માઇકલ વ્હેટલીને હરાવ્યા છે. આ જીતથી ડેમોક્રેટિક પાર્ટીએ રિપબ્લિકન પક્ષ પાસેથી એક મહત્ત્વપૂર્ણ બેઠક મેળવી છે. બીજી તરફ, ન્યૂ હેમ્પશાયરમાં ડેમોક્રેટિક ઉમેદવાર ક્રિસ પાપાસે રિપબ્લિકન જોન સુનુનૂને હરાવ્યા છે. આ જીત સાથે ક્રિસ પાપાસ અમેરિકાની સેનેટમાં ચૂંટાયેલા પ્રથમ ખુલ્લેઆમ સમલૈંગિક પુરુષ સેનેટર બન્યા છે. આ પરિણામને અમેરિકાના રાજકીય ઇતિહાસમાં નોંધપાત્ર ઘટના તરીકે જોવામાં આવી રહ્યું છે.
ફ્લોરિડાની સેનેટ બેઠક પર રિપબ્લિકન એશલે મૂડીની જીત
ફ્લોરિડાની સેનેટ બેઠક પર રિપબ્લિકન ઉમેદવાર એશલે મૂડીએ ડેમોક્રેટિક ઉમેદવાર એંજી નિક્સનને હરાવ્યાં છે. માર્કો રુબિયોને વિદેશ મંત્રી બનાવવામાં આવ્યા બાદ ખાલી પડેલી આ બેઠક પર ગવર્નર રોન ડીસેન્ટિસે એશલે મૂડીની નિમણૂક કરી હતી. આ જીત સાથે એશલે મૂડી છેલ્લા ચાર દાયકામાં ફ્લોરિડાથી આ બેઠક જીતનાર પ્રથમ મહિલા બન્યાં છે.
મિડટર્મ ચૂંટણીથી ટ્રમ્પના બાકીના કાર્યકાળ પર શું અસર પડશે?
અમેરિકાના રાષ્ટ્રપતિ ડોનાલ્ડ ટ્રમ્પ માટે આ મિડટર્મ ચૂંટણી અત્યંત મહત્ત્વપૂર્ણ હતી. ચૂંટણી પહેલાં જાહેર થયેલા જ્હોન ઝોગ્બી અને યુગવ (YouGov) સહિતના ત્રણ મોટા ઓપિનિયન પોલ્સમાં ડેમોક્રેટ્સને 6થી 9.5 ટકા સુધીની લીડ દર્શાવવામાં આવી હતી. જો ડેમોક્રેટિક પાર્ટી સેનેટ અને હાઉસ બંનેમાં બહુમતી મેળવવામાં સફળ થાય છે, તો ટ્રમ્પના બાકીના બે વર્ષના કાર્યકાળમાં સરકાર માટે કાયદા અને બજેટ પસાર કરાવવાનું મુશ્કેલ બની શકે છે. વિપક્ષ કોંગ્રેસમાં બહુમતી ધરાવશે તો સરકારના નિર્ણયો અને નીતિઓ પર વધુ સઘન દેખરેખ રાખી શકશે. આ ઉપરાંત, ઈઝરાયેલ અને ઈરાન સાથે જોડાયેલી વિદેશ નીતિ સહિતના મુદ્દાઓ પર પણ કોંગ્રેસમાં રાજકીય ચર્ચા અને દબાણ વધી શકે છે. હવે બંને ગૃહોમાં અંતિમ બહુમતીનું ચિત્ર અમેરિકાના રાજકારણની આગામી દિશા નક્કી કરવામાં મહત્ત્વપૂર્ણ સાબિત થશે.
