Indians Top OECD Citizenship List Over Five Years: આજે વૈશ્વિક સ્તરે એક મોટો ટ્રેન્ડ જોવા મળી રહ્યો છે જ્યાં વિકસિત અને સમૃદ્ધ દેશોમાં કાયમી વસવાટ કરવા માટે ભારતીયો હંમેશા અગ્રેસર રહ્યા છે. તાજેતરમાં જ ઇકોનોમિક કોઓપરેશન એન્ડ ડેવલપમેન્ટ (OECD) દ્વારા 'ઇન્ટરનેશનલ માઇગ્રેશન આઉટલુક - 2026' રિપોર્ટ જાહેર કરવામાં આવ્યો છે, જેણે દુનિયાભરનું ધ્યાન ખેંચ્યું છે. આ રિપોર્ટ મુજબ, દુનિયાના અમીર દેશોમાં કાયમી રૂપે સ્થાયી થવા અને નાગરિકતા મેળવવાની યાદીમાં ભારત ફરી એકવાર સમગ્ર વિશ્વમાં નંબર-1 ના સ્થાન પર રહ્યું છે. વિદેશી ધરતી પર જઈને પોતાની કારકિર્દી બનાવવાની આ ઘેલછા ભારતમાં સતત વધતી જોવા મળી રહી છે.
પાંચ વર્ષમાં રેકોર્ડબ્રેક 9.25 લાખ ભારતીયો બન્યા વિદેશી નાગરિક
ઓર્ગેનાઇઝેશન ફોર ઇકોનોમિક કોઓપરેશન એન્ડ ડેવલપમેન્ટ (OECD) ના આંકડા પર નજર કરીએ તો, વર્ષ 2020 થી 2024ના પાંચ વર્ષના સમયગાળા દરમિયાન અંદાજે 9.25 લાખ ભારતીયોએ OECD સભ્ય દેશોની કાયમી નાગરિકતા સ્વીકારી લીધી છે. આ આંકડો અગાઉના એટલે કે વર્ષ 2015 થી 2019 ના સમયગાળાની સરખામણીમાં આશ્ચર્યજનક રીતે 41 ટકા જેટલો વધુ છે. OECD ના કૂલ 38 સભ્ય દેશોમાં આ પાંચ વર્ષમાં કુલ 87 લાખ નવા નાગરિકો બન્યા હતા, જેમાંથી એકલા ભારતીયોની હિસ્સેદારી અંદાજે 10 ટકા જેટલી મોટી રહી છે. આ યાદીમાં ભારત બાદ સીરિયા અને મેક્સિકો જેવા દેશોનો ક્રમ આવે છે, જેના 5.9 લાખ નાગરિકોએ વિદેશી નાગરિકતા મેળવી છે.
કેનેડા, અમેરિકા અને ઓસ્ટ્રેલિયા બન્યા ભારતીયોની પહેલી પસંદ
વર્ષ 2024ના આંકડાઓ ખૂબ જ ચોંકાવનારા અને રસપ્રદ છે કારણ કે માત્ર એક જ વર્ષમાં 2.30 લાખ ભારતીયોએ વિદેશી નાગરિકતા મેળવી છે. આ મામલે કેનેડા ભારતીયોની સૌથી પહેલી અને પ્રિય પસંદગી સાબિત થયું છે, જ્યાં એક વર્ષમાં 87,320 ભારતીયોએ નાગરિકતા લીધી છે. કેનેડા પછી અમેરિકામાં 48,820 અને ઓસ્ટ્રેલિયામાં 28,969 ભારતીયોએ ત્યાંની નાગરિકતા સ્વીકારીને કાયમી વસવાટ શરૂ કર્યો છે. જો માત્ર કેનેડાની વાત કરીએ તો, છેલ્લા પાંચ વર્ષમાં કૂલ 2.61 લાખ ભારતીયોને કેનેડાનું નાગરિકત્વ મળ્યું છે, જે અગાઉના વર્ષોની સરખામણીમાં ૧૫૦ ટકાનો જંગી ઉછાળો દર્શાવે છે.
પ્રવાસીઓની કુલ સંખ્યામાં ઘટાડો છતાં ભારત સૌથી મોટો સ્ત્રોત દેશ
નાગરિકતા મેળવવા ઉપરાંત નવા પ્રવાસીઓ અને વૈશ્વિક રોજગાર બજારને લઈને પણ રિપોર્ટમાં મહત્વના ખુલાસા થયા છે. વર્ષ ૨૦૨૪ માં પણ OECD દેશોમાં જનારા નવા પ્રવાસીઓ માટે ભારત સૌથી મોટો સ્ત્રોત દેશ રહ્યો છે, જોકે કુલ સંખ્યામાં અગાઉની સરખામણીએ ૧૯ ટકાનો થોડો ઘટાડો નોંધાયો છે (વર્ષ 2023 માં 6.07 લાખથી ઘટીને 2024 માં 4.94 લાખ થયા છે). OECD ના મહાસચિવ માથિયાસ કોર્મનના જણાવ્યા અનુસાર, વિકસિત દેશોની કુલ અર્થવ્યવસ્થા અને રોજગારમાં પ્રવાસીઓનો મોટો ફાળો છે. યુરોપ અને પશ્ચિમના દેશોમાં સતત વધી રહેલી વસ્તીની ઉંમર અને શ્રમિકોની ઘટતી જતી સંખ્યાને પહોંચી વળવા માટે વિદેશી કુશળ કામદારો અત્યંત જરૂરી બન્યા છે.
ટેક્નોલોજી અને ભવિષ્યની ઇમિગ્રેશન નીતિઓની અસર
વિકસિત દેશોમાં એસ.ટી.ઇ.એમ. (STEM - સાયન્સ, ટેક્નોલોજી, એન્જિનિયરિંગ અને મેથેમેટિક્સ) ક્ષેત્રોમાં વિદેશી મૂળના સ્નાતકો અને પ્રોફેશનલ્સની ભાગીદારી ખૂબ જ પ્રશંસનીય રહી છે. જો કે, આવનારા સમયમાં ઘણા દેશો દ્વારા પોતાની ઇમિગ્રેશન નીતિઓને વધુ કડક બનાવવામાં આવી રહી છે, જેના કારણે અસ્થાયી કામદારો અને વિદ્યાર્થીઓની સંખ્યામાં આગામી દિવસોમાં ઘટાડો જોવા મળી શકે છે. તેમ છતાં, કાયમી નાગરિકતા મેળવવાની આ વૈશ્વિક રેસમાં ભારતીયો આગામી સમયમાં પણ મોખરે જ રહેશે તેવી પ્રબળ શક્યતાઓ સેવાઈ રહી છે.
