ગુજરાત વંદન

સફળ રોકાણકાર જિમ સિમન્સનું નિધન: વિશ્વના ફાઈનાન્સ વર્લ્ડને ટ્રેડિંગનું શીખવ્યું એક નવું પરિમાણ, આર્ટિફિશિયલ ઈન્ટેલિજન્સનો શરૂ કર્યો ઉપયોગ

11 May, 2024

વિશ્વના સૌથી સફળ રોકાણકારોમાંના એક જિમ સિમન્સનું શનિવારે 11 મેના રોજ 86 વર્ષની વયે નિધન થયું છે. ગણિતશાસ્ત્રી એવા જિમે વિશ્વના ફાઈનાન્સ વર્લ્ડને ટ્રેડિંગનું એક નવું પરિમાણ શીખવ્યું હતું. તેમણે 1980ના દાયકામાં કોમ્પ્યુટર આધારિત ક્વોન્ટિટેટિવ અભિગમ અપનાવીને ટ્રેડિંગની દુનિયામાં ક્રાંતિ લાવી હતી. જોકે નોંધવા જેવી વાત તો એ છે કે વોલ સ્ટ્રીટના લોકો પાછળથી તેમને અનુસર્યા હતા. તેમણે અને તેમની ટીમે માર્કેટમાં સતત સારા પ્રદર્શન માટે ટ્રેડિંગ અલ્ગોરિધમ્સ અને આર્ટિફિશિયલ ઈન્ટેલિજન્સનો ઉપયોગ કર્યો હતો. તેના ઉપયોગથી તેમણે વોરેન બફેટ અને જ્યોર્જ સોરોસને પણ પાછળ પાડી દીધા હતા.

જિમ સિમન્સે સૌથી સફળ હેજ ફંડ્સમાંના એક રેનેસાની સ્થાપના કરી હતી. તેમના મેડેલિયન ફંડે ત્રણ દાયકા સુધી સરેરાશ 60 ટકાથી વધુ વળતર આપ્યું છે, જે પોતાનામાં એક અવિશ્વસનીય ઘટના છે. તેઓ સૌપ્રથમ વર્ષ 2010માં તેના સીઈઓ પદ પરથી નિવૃત્ત થયા હતા અને ત્યારબાદ 2021માં ચેરમેન પદ પણ છોડી દીધું હતું. ફોર્બ્સ અનુસાર, તેમની અંદાજિત સંપત્તિ 34 અબજ ડોલર હતી.

સિમન્સે મેડિકલ, સાયન્સ રિસર્ચ અને એજ્યુકેશન વગેરે માટે અબજો ડોલરનું દાન આપ્યું હતું. તેમણે ડેમોક્રેટિક ઉમેદવારોનું સમર્થન અને લોકતંત્રને મજબૂત કરવા માટે નોંધપાત્ર દાન પણ આપ્યું હતું. સિમન્સને ગણિતની દુનિયામાં તેમના યોગદાન માટે 2022 માં ‘એબેલ પ્રાઈઝ’ એનાયત કરવામાં આવ્યું હતું. ત્યારે તેમણે કહ્યું હતું કે ‘મેં ઘણું ગણિત કર્યું. મેં ઘણા પૈસા કમાયા, અને મેં લગભગ બધા પૈસા દાનમાં આપી દીધા. આ જ મારા જીવનની કહાની છે.

ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ‎

https://shorturl.at/hjzN0