ગુજરાત વંદન

દેશભરમાં ત્રીજા તબક્કાનું મતદાન શરૂ: અમદાવાદમાં મુખ્યમંત્રી ભુપેન્દ્ર પટેલે કર્યું મતદાન

07 May, 2024

ગુજરાત સહિત દેશની 94 બેઠકો માટે 7 મેના રોજ લોકસભાની ચૂંટણીનું ત્રીજા તબક્કાનું મતદાન થવા જઈ રહ્યું છે. જેમાં દેશના ગૃહમંત્રી અમિત શાહ, મધ્યપ્રદેશના પૂર્વ મુખ્યમંત્રી શિવરાજ સિંહ ચૌહાણ, કેન્દ્રીય મંત્રી જ્યોતિરાદિત્ય સિંધયા અને મહારાષ્ટ્રમાં મહત્વની ગણાતી બારામતી બેઠક માટે સુપ્રિયા સુલેનું ભાવિ ઈવીએમમાં કેદ થશે. અમદાવાદની શીલજમાં આવેલી એક સ્કુલમાં મુખ્યમંત્રી ભુપેન્દ્ર પટેલે મતદાન કર્યું હતું.

બે તબક્કાના મતદાનમાં શરૂઆતમાં 60 ટકાનો આંકડો જાહેર થયો હતો. જોકે 11 દિવસ પછી ચૂંટણી પંચે 66 ટકા મતદાન થયાનું જાહેર કર્યું હતું. ગઈ વખતની તુલનામાં ઓછું મતદાન હોવાથી ત્રીજા તબક્કા સહિત બાકીના તબક્કામાં વધુમાં વધુ મતદાન થાય એવા પ્રયાસો ચૂંટણી પંચ, રાજકીય પક્ષો અને એનજીઓ દ્વારા થયા છે.

ગુજરાતમા 2019માં અંદાજે 70 ટકા મતદાન થયું હતું અને અને તમામ 26 બેઠકો ભાજપે હસ્તગત કરી હતી. ભાજપના ઉમેદવારોમાં સી આર પાટીલ અને અમિત શાહ નવસારી અને ગાંધીનગર બેઠક પરથી સૌથી વધુ મતોની સરસાઈથી જીત્યા હતા. આ વખતે ભાજપે સતત ત્રીજી વખત 26 બેઠકો જીતવાનું અને તમામ બેઠકો પાંચ લાખની સરસાઈથી જીતવાની જાહેરાત કરી છે. પરંતુ રૂપાલા ઈફેક્ટ અને ક્ષત્રિય સમાજની નારાજગી તથા એકદરે ઓછા મતદાનથી પાંચ લાખની લીડ મળશે કે કેમ તેવી અટકળો ચાલી રહી છે.

ગુજરાતમાં આ વખતે કોંગ્રેસ અને આપ પાર્ટી સાથે મળીને લડી રહી છે. ભરૂચ અને ભાવનગરની બેઠક આપ પાર્ટીને આપવામાં આવી છે. બાકીની 24 બેઠકો પર કોંગ્રેસના ઉમેદવારો હતા પરંતુ તેમાંથી સુરતમાં ઉમેદવાર નિલેશ કુંભાણીનું ઉમદવારી પત્ર રદ થતા અને બાકીના ઉમેદવારોએ પણ ઉમેદવારી પરત ખેંચતા આ બેઠક ભાજપના ઉમેદવાર મુકેશ દલાલે બિનહરીફ જીતી લીધી છે. તેથી 7મીએ ગુજરાતમાં 25 બેઠકો માટે મતદાન હાથ ધરાશે.

ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ‎

https://shorturl.at/hjzN0