વકીલે કહ્યું- 'માય લોર્ડ, હું ટ્રાફિક જામમાં અટવાયો છુંઃ સુપ્રીમ કોર્ટની સુનાવણીમાં વકીલે કારમાં બેઠા બેઠા ઓનલાઇન કરી દલીલો...!!
![top-news](https://gujaratvandan.com/public/uploads/images/newsimages/GujaratVandan13022024_090018_WhatsApp Image 2024-02-13 at 2.29.49 PM.jpeg)
- 13 Feb, 2024
ખેડૂતોનું આંદોલન ફરી શરૂ થયા બાદ દિલ્હીના રસ્તાઓ પર ભારે ટ્રાફિક જામ જોવા મળી રહ્યો છે. સામાન્ય નાગરિકોની સાથે અધિકારીઓ, નેતાઓ અને વકીલો પણ આ ટ્રાફિક જામની ઝપેટમાં આવી રહ્યા છે. આજે દિલ્હીમાં એક વકીલે ટ્રાફિક જામના કારણે પોતાની કારમાં બેસીને કોર્ટમાં ઓનલાઇન પોતાની દલીલ રજૂ કરી હોવાનો રસપ્રદ કિસ્સો બન્યો હતો.
આજે ફરી દેશના વિવિધ રાજ્યોમાંથી ખેડૂતો દિલ્હી પહોંચી રહ્યા છે. ખેડૂતોની 'દિલ્હી ચલો' કૂચની ઘોષણા બાદ વહીવટીતંત્ર પૂરજોશમાં છે, દિલ્હીની સરહદો પર વિવિધ સ્થળોએ બેરિકેડ અને કાંટાળા વાયરો લગાવવામાં આવ્યા છે. ખેડૂતોના આ પ્રદર્શનને લઈને બાર એસોસિએશનના પ્રમુખ આદિશ અગ્રવાલે સુપ્રીમ કોર્ટના મુખ્ય ન્યાયાધીશ ચંદ્રચુડને પત્ર લખીને સંજ્ઞાન લેવાની અપીલ કરી હતી, જેના પર કોર્ટે સુનાવણી કરી હતી.
સુનાવણી દરમિયાન, એક વકીલે કારમાં બેસીને દલીલ કરવાનું શરૂ કર્યું, જેના જવાબમાં જસ્ટિસ ઓકાએ કહ્યું, "અમને વકીલો વર્ચ્યુઅલ રીતે દેખાય તે સામે કોઈ વાંધો નથી, પરંતુ આ રીતે ચાલતી કારમાં નહીં." તેના જવાબમાં વકીલે કહ્યું, માય લોર્ડ્સ, ખેડૂતોના વિરોધને કારણે હું જામમાં ફસાઈ ગયો છું. વકીલનો આ જવાબ સાંભળીને બેન્ચે કહ્યું ઓહ! એમ વાત છે...જો આ કારણ હશે તો અમે માફ કરીશું.
ખેડૂતોની માર્ચને કારણે દિલ્હીમાં ઘણી જગ્યાએ ટ્રાફિક જામ છે. ખેડૂતોના વિરોધને કારણે લોકોને ગાઝીપુર બોર્ડર અને ચિલ્લા બોર્ડર પર ટ્રાફિક જામનો સામનો કરવો પડી રહ્યો છે. આ સિવાય દિલ્હી, નોઈડા અને ગુરુગ્રામમાં ટ્રાફિક જામથી લોકો પરેશાન છે. ખેડૂતોની દિલ્હી તરફ કૂચ કરવાની જાહેરાત બાદથી દિલ્હી પોલીસે દિલ્હી સરહદો પર ઘણી વ્યવસ્થા કરી છે.
ગુજરાત વંદનના whatsapp ચેનલમાં જોડાવા આ લિંક પર ક્લિક કરોઃ
ગુજરાત વંદનના whatsapp ગ્રુપમાં જોડાવા આ લિંક પર ક્લિક કરોઃ